Maamulka Gobolka Shabeelaha Hoose ayaa faah faahin ka bixiyay diyaarad maanta duhurkii ku dhacday duleedka degmada Afgooye ee Gobolka Shabeellaha Hoose, halkaasi oo loo diray ciidamada amniga ee dowladda.
Guddoomiyaha Gobolka Shabeellaha Hoose Cabdiqaadir Maxamed Nuur Siidii oo la hadlay Radio Muqdisho ayaa tilmaamay in ay tahay markii labaad oo ay diyaarad ku dhacdo gobolka, waxaana uu intaa ku daray inay wadaan baaritaanno ku aadan sida ay ku ogaan lahaayeen waxa ay ahayd diyaaradda dhacday, isla markaana ay goobta u direen ciidamada xoogga dalka iyo kuwa AMISOM si ay ula wareegaan amniga, maadaama ay goobta ka agdhawyihiin maleeshiyada Al-shabaab.
“Waa sax diyaaradii labaad ayaa ku soo dhacday tuulo hoostagta Afgooye, meel 9km dhanka galbeed uga beegan magaalada Afgooye, baaritaan ayaa inoo socda oo aan ku ogaaneyno cidda iska leh iyo waxa ay ahayd, jidka tooro toorow iyo Afgooye isku xira ayay ku soo dhacday” ayuu yiri C/qaadir Maxamed Nuur Sidii
Wararka qaar ayaa sheegaya in xilliga diyaaradda ay dhaceysay ay roobab xoogan ka da’ayeen tuulada ay ku dhacday, lamana oga inay cimilada oo xun awgeed ay u dhacday diyaarada iyo in kale.
