Agaasimaha Guud ee Isbitaalka Madiina ee magaalada Muqdisho Dr Maxamed Cabiraxmaan Jaamac (Portugal) ayaa sheegay in adeegyo kala duwan ay u qabtaan bulshada oo ay ugu horeysay la tacaalidda dadka qaba dhaawacyada kala duwan.
Dr Maxamed Cabiraxmaan Jaamac oo wareysi gaar ah siiyay Radio Muqdisho ayaa sheegay in howlo baaxadleh ay u hayaan bulshada, ayna xoogga saaraan wax u qabashada dadka qaba dhaawacyada kala duwan, kuwa shilalka ku soo dhaawacma iyo kuwa qaraxyada la kulma, isagoo xusay inay soo badatay dhallinyarada tooreyda u geysaneysa dhallinta kale oo inta badan saameysa dhallinyarada ku nool Gobolka Banaadir.
“Muddadii 40-ka sano ee dalka waxa uu Isbitaalka la tacaali jiray xaaladaha dhaawacyada soo gaara bulshada, haba ugu darnaadee 10-kii sano ee la soo dhaafay, waxaana jira dhaawacyo sababay arrimaha amniga iyo kuwa dhallinyarada dhexdooda isu geystaan oo ay ugu horeyso tooreyda”. Ayuu yiri Dr Maxamed.
Agaasimaha ayaa tilmaamay in mararka qaar la keeno Isbitaalka la geeyo dad dhaawacyo tooreey u dhinta oo la garan waayo ehelkooda, kuwaasi oo aan u sameyno inaan sawiradooda ku baahino baraha bulshada si loo helo
Agaasimaha Guud ee Isbitaalka Madiina ee magaalada Muqdisho Dr Maxamed Cabiraxmaan Jaamac (Portugal) ayaa soo dhaweeyay baaqa uu maanta soo saaray Ergeyga gaarka ah ee Madaxweynaha Jamhuuriyadda Federaalka Soomaaliya u qaabilsan Arrimaha Gurmadka Abaaraha, Mudane Cabbdiraxmaan Cabdishakuur Warsame ee ku aadan xaaladda abaareed ee dalka jirta, ayna soo jeedinayaan in bulshada ay dhexdooda iscaawiso, kan maamul ahaana ay diyaar u yihiin inay ka qeyb qaataan kaalinta uga aadan arrimaahaas.
Dr Maxamed Cabiraxmaan Jaamac ayaa hoosta ka xariiqay inay qorsheynayaan sidii loo balaarin lahaa isbitaalka oo ay ku soo kordhiyaan xarumo cusub iyo qalab casri ah.
“Xaqiiqatan January 2022-ka ayaan ka shaqo bilaabay Isbitaalka, waxaana ku soo kordhinay qeybaha ICU, qeybta lagu xanaaneeyo bukaanada ku jira xaaladda adag, muddadi shanta bil ahayd oo aan ku guuleysanay, waxaan kaloo ku guuleysanay dib u habeynta qeybta gargaarka deg degga ah iyo inaan ku soo kordhinay qeybo kale oo cusub, anagoo dhagax dhignay qeybta OPD, oo ah qeybta bukaan socod eegtada oo aan rabno inaan weyneyno oo aan fariisino Dhakhaatiir taqasus u leh qeybta bukaan socod eegtada”. Ayuu yiri Dr Maxamed Cabdiraxmaan.
