Maamulka KMG ah ee Koonfur Galbeed, Soomaaliya ayaa magacaabay guddi wasiirro ah oo u xilsaaran amniga gobollada maamulkaasi.
Kulan golaha wasiirrada ee maamulkaasi ay shalay ku yeesheen magaalada Baydhabo ayaa lagu magacaabay guddigaasi oo ka kooban Shan xubnood.
Wasiirka warfaafinta ee maamulka K/galbeed, Xasan Cabdi Maxamed ayaa warbaahinta u sheegay in guddigaasi ay u xilsaaranyihiin amniga guud ee deegaannada hoos yimaada maamulka.
Wuxuu intaasi kudaray in wasiirradu ay ka wada hadleen sidii loo dardar galin lahaa dagaalka ka dhanka ah Al-Shabaab iyo wadashaqaynta ciidammada dowladda federaalka ah iyo maamulka.
Guddigan ayaa lagu magacaabay kulankii Labaad oo ay yeeshaan wasiirrada maamulka KMG ah ee Koonfur Galbeed.
