Wasiirka amniga gudaha Koofur Galbeed, Isaaq Cali Subag, Guddoomiyaha Gobolka Shabeellada hoose, Ibraahim Cali Aaden (Najax), Xildhibaan Nuur Siidoow oo ka tirsan Baarlamanka Soomaaliya iyo mas’uuliyiin kale ayaa kormeer howleed ku tagay degaanka Bariirre oo laga xoreeyay dhawaan Kooxda Al-Shabaab.
Guddoomiyaha Shabeellada hoose, Ibraahim Aaden (Najax), oo la hadlayay warbaahinta Qaranka Soomaaliyeed ayaa sheegay in ay safar xagga Lugta ah ku tageen degaanka Bariirre.
Ujeeddada safarkooda ayuu ku sheegay Guddoomiyuhu in ay u kuur galaan xaaladda amni , dhiirri gelinta Ciidanka Xoogga Dalka iyo wax ka ogaashaha baahiyaha ay tabanayaan Shacabka halkaasi ku dhaqan oo kasoo kabanaya dhibaatooyinkii ay gaarsiisay kooxda nabad-diidka.
Mudane; Najax ayaa Shacabka halkaasi ku dhaqan u soo jeediyay in ay garab istaagaan Dowladdooda, kana feejignaadaan dhagarta cadowga, isagoo u ballan qaaday in ay dib usoo celinayaan dhammaan adeegyadii Bulshada ee ay bur-buriyeen Argagixisadu.
Ibraahim Aaden Cali (Najax) Guddoomiyaha Shabeellada hoose ayaa u mahad celiyay taliyeyaasha Ciidamada ku sugan Bariirre iyo degaannada ku dhow-dhow,wuxuuna ku ammaanay sida ay ugu guuleysteen cadowga Al-Shabaab iyo sida ay u xaqiijiyeen amniga Bariirre.
