Munaasabad balaaran oo lagu maamuusayey maalinta deegaanka aduunka ayaa maanta lagu qabtay xaafada islii ee magaalada Nairobi gaar ahaan dugsiga hoose ee Eastligh Airbase,waxaana munaasabadasi kasoo qeyb galay mas’uuliyyin uu kamid ahaa xildhibaanka laga soo doorto xaafada islii xildhibaan Yuusuf Xasan Cadbi iyo mas’uuliyiin kale oo ka socday dowlada hoose ee degmada kamakunji.
Intii ay socotay munaasabadda ayaa waxaa dhir lagu beeray qeybo kamid ah xaafada islii,iyadoo uu xildhibaanku ku talaalay geedkii ugu horeeyey dugsiga Hoose ee Eastliegh Airbase School.
Xildhibaan Yuusuf Xasan Cabdi ayaa sidoo kale xariga ka jaray qeybo cusub oo lagu kordhiyey dhismaha Dugsigan Eastligh Airbase School dhismahaasi oo dhaqaalaha ku baxay ay iska kaashadeen sanduuqa horumarinta degmooyinka ee CDF-ta loo yaqaano iyo xafiiska xildhibaanka,iyadoo la shaaciyey in dhawaan laga hirgalin doono iskuulka dhismaha machad farsamo oo noqon doona kii ugu horeeyey ee noociisa ah oo ay yeelato xaafadan islii.
Xildhibaan Yuusuf Xasan Cabdi ayaa ka codsaday bulshada ku nool xaafada islii inay laamaha ammaanka ee dowlada kala shaqeeyaan sidii loo sugi lahaa ammaanka xaafadan islii “ kuligeen hal cadow ayeynu leenahay cadawgaas oo ah kan aad kasoo qaxdeen anagana halkan nagu dhibaya kaasoo loo baahanyahay in aynu ka wada shaqeyno sidii aynu isaga qaban laheyn ”
Munaasabadan ayaa waxaa kasoo qeyb galay arday farabadan ooo wax ka barata dugsiyada xaafadan islii, waalidiin iyo dadweyne kale ayaa waxaa xildhibaanka lagaga codsaday inuu wax ka qabto dhibaatooyinka soo noqnoqday ee shacabka soomaaliyeed kala kulmaan ciidamada ammaanka ee dalkani kenya iyo in la joogteeyo horumarada noocan oo kale ah ee dhanka waxbarashada.
Cabdiraxmaan Cumar Cabdi ( Cabdiraxman Somali )
Warbaahinta Qaranka .
Nairobi Kenya.
