Maareeyaha Dekedda Muqdisho, Amb. Maxamed Cali Nuur Ameeriko, ayaa maanta ku qaabilay xarunta Dekedda Muqdisho Dr. Axmed Fiqi Elmi, kulankaan ayaa diiradda lagu saaray fursadaha iskaashi ee dhinacyada tababarka xirfadeed, saadka dekedaha iyo horumarinta xirfadaha.
Intii uu kulanku socday waxaa lagu soo bandhigay Mashruuca FORLIS – Tababar iyo iskaashi ku saabsan saadka dekedaha iyo adeegyada logistiga ee u dhexeeya Talyaaniga iyo Soomaaliya, kaas oo ay maalgelisay Gobolka Ismaamulka Friuli-Venezia Giulia.
Kulanka waxaa lagu falanqeeyay fursado iskaashi oo ay ka mid yihiin booqasho waxbarasho oo dhalinyaradu ku tagaan Dekedda Muqdisho kahor safarkooda Talyaaniga, suurtagalnimada shaqo-barasho dhammaadka barnaamijka gudaha nidaamka dekedda Trieste, iyo horumarinta barnaamijyo Training of Trainers ah.
Maareeyaha ayaa soo dhaweeyay mashruuca, isagoo tilmaamay muhiimadda ay Soomaaliya u leedahay in la horumariyo xirfadaha farsamo gaar ahaan kuwa ku saabsan dekedaha iyo logistiga.
