Madaxda dowlad Goboleedka Koonfurgalbeed ee Soomaaliya ayaa ka tacsiyadeeyay intii ku dhimatay weerarkii maleeshiyada Al-Shabaab ay ku qaadeen hotelka Dayax ee magaalada Muqdisho, iyagoo si gaar ah tacsi ugu diray ehelada labo malaaq oo weerarka ku dhintay.
Wasiirka Warfaafinta ee Koonfurgalbeed Soomaaliya Ugaas Xasan Cabdi oo la hadlay Radio Muqdisho ayaa sheegay in weerarka argagixisada Al-Shabaab ku qaadeen ay Hotel Dayax ay ku dhinteen duubad ka mid ah duubabka ka soo jeeda Koonfurgalbeed, kuwaasi oo deganaa nawaaxiga Hotelka.
“Malaaq Malabow Malaaq Isxaaq Xasan Keyrow iyo Malaaq Cabdirashiid Sheekh Casalaan ayaa ku dhinta weerarkii saaka, Allaha u naxariisto, waxaa kaloo dhaawacyo ay ka soo gaareen salaadiin kale oo gaareysa ilaa iyo saddex, kuwaasi oo iminka lagu dabiibayo mid ka mid ah isbitaalada magaalada Muqdisho” ayuu yiri Wasiirka Warfaafinta Koonfurgalbeed ee Soomaaliya.
Ugaas Xasan Cabdi Wasiirka Warfaafinta ee Koonfurgalbeed ayaa guud ahaan shacabka Soomaaliyeed uga tacsiyadeeyay dadkii ay waxyeelada ka soo gaartay, isagoo kuwa ku dhaawacmay Alle uga baryay in uu bogsiiyo.
