Madaxweynayaasha Maamulada Puntland iyo Jubba Cabdiwali Maxamed Cali Gaas iyo Axmed Maxamed Islaam Madoobe ayaa maanta soo gaaray magaalada Muqdisho ee caasimada Dalka.
Mas’uuliyiintan ayaa waxaa garoonka diyaaradaha Aadan Cadde kusoo dhoweeyay xubno ka socda labada Gole ee dowladda iyo mas’uuliyiin kale.
Weftiga uu hoggaamiyanayo Madaxweynaha Puntland waxaa ka mid ah Wasiirada Waxbarashada, Deegaanka, Shaqada iyo Shaqaalaha, Wasiir ku-xigeenada Maaliyadda, xubno ka tirsan Golaha Wakiillada ee Puntland iyo mas’uuliyiin kale.
Dr Cabdiweli Gaas ayaa ka hor inta uusan ka soo dhoofin magaalada Garoowe waxa uu yiri “Waxaan u amba baxaynaa magaalada xamar oo aanu kaga qayb geleyno shirka madasha wadatashiga Soomaaliyeed, baahida Puntland ayaa geyn doonaan Shirka”.
Madaxweynaha Maamulka KMG ah ee Jubba Axmed Maxamed Islaam ayaa isna sidoo kale waxa uu hogaaminayaa wafdi ka tirsan Wasiirada maamulkaasi, kuwaasi oo qeyb ka noqon doono madaxda ka qeyb galaysa shirka ka furmaya Muqdisho.
Madaxda Maamulada Puntland, Jubba, Galmudug iyo Koofur galbeed ayaa ka qeybgalaya Shirka wadatashiga iyo hanaanka loo marayo doorashada 2016 oo uu si rasmi ah uga furmay magaalada Muqdisho.
