Nana Akufo-Addo, ayaa loo dhaariyay xilka cusub oo ah madaxweynaha dalka Ghana kadib markii uu bishii la soo dhaafay uu ka guuleystay madaxweynaha talada hayay John Mahama.
Ku dhowaad 11 hogaamiye oo qaaradda Afrika ka socday iyo in ka badan 6,000 oo ruux ayaa ka qeybgalaya xafladda caleemo saarka madaxweynaha cusub taas oo ka dhacaysa caasimadda dalkaas ee , Accra, xilli amniga si weyn loo adkeeyay.
Related posts
Mr Akufo-Addo, oo da’diisa tahay 72 sano jir ayaa ahaa qareen xuquuqda aadanaha u ololeeya, waxaana uu balan qaaday xilligii ololaha doorashada waxbarasho lacag la’aan ah dugsiyada sare iyo in uu hirgelin doono warshado badan si shaqo badan loo helo.
Hase yeeshee, dadka qaar ayaa waxaa ay su’aal gelinayaa sida uu ugu dhabeyn karo balan qaadiisa.
Madaxweynaha xilka ka degeya ayaa sidoo kale, ka qeybgali doona xafladda oo ka dhici doonta fagaare ku yaala magaalada caasimadda ah, waddooyinka waa weyn ee soo gala goobta ayaa gebi ahaamba la xirey.
Mr Akufo-Addo, oo ka tirsan xisbiga cusubย ee Wadaniyadda ( New Patriotic Party) ayaa labo mar horey ugu tartamay xilka madaxweynaha, iyadoo la aaminsan yahay in waxyaabaha sida weyn u caawiyay ay tahay dhibaatada dhaqaale ee wadanka heystay iyo balan qaadiisa oo ah in uu wax ka qaban doono arintaas.
Xilal kala duwan ayuu horey u soo qabtay oo ay kamid tahay wasiirka Cadaaladda iyo wasiirka arimaha dibada intii u dhaxeysay 2001-2007, isagoo wacad ku maray in dalka uu ka dhigi doono mid xisbiyo badan leh isla markaana sheegay in warshado uu ka furi doono in ka badan 200 ย degmo oo wadanka oo dhan ah.
John Mahama, oo ah madaxweynaha xilka ka degeya ayaa lagu dhaliiley in uu wax ka qaban waayay dhaqaale burburka ka jira dalka taas oo keentay in hey’adda lacagta aduunka ee IMF ay isku daydo in ay badbaadiyo dhaqaalaha dalka Ghana.
Dalka ku yaala galbeedka qaaradda Afrika ee Ghana ayaa ah wadan ay xisbiyo badan ay ku loolamaan talada, tan iyo 1992, isla markaana xilalka ay ugu kala wareegayeen si nabadgeliyo ah.
