Madaxweynaha Jamhuuriyadda Soomaaliya, ayaa ugu baaqay shacabka Soomaaliyeed mar kale in ay u midoobbaan dagaalka ka dhanka ah Al-Shabaab, waxa uuna tacsi u diray dadkii ku waxyeelloobay qaraxii ka dhacay agagaarka Dakedda Muqdisho.
Madaxweynaha Jamhuuriyadda F. Soomaaliya, mudane Xasan Sheekh Maxamuud, ayaa ugu horreyn tacsi wadajir ah u diray shacabka Soomaaliyeed ee ay dhibaatada ka soo gaartay Qaraxa aragagixiso ee ka dhacay goob dad masaakiin ay ku sugnaayeen oo ku dhow dakedda Muqdisho iyo ciidammadii amniga sugayey ee ay waxyeellada soo gaartay iyaguna, waxaa uu EEBBE uga barayey in uu Jannadiisa geeyo kuwii dhintay, dhaawacyaduna ay dhaqsi u bogsadaan.
Dhanka kale Madaxweyne Xasan Sheekh Maxamuud, ayaa mar kale ummadda Soomaaliyeed ugu baaqay in ay u midoobaan oo ay sii laba-laabbaan dagaalka caalamiga ah ee ay kula jiraan argagixisada, isagoo sheegay in heerka dhimashada ay marayaan kooxahaasi, loona baahan yahay in ciidanka Qaranka lagu gacan siiyo dagaalladaasi, si dalkeenna iyo dadkeenna aan uga ilaalinno sharwadaasha ayuu raaciyey madaxweynaha hadalkiisa.
Madaxweynaha J. Soomaaliya, Xasan Sheekh Maxamuud, ayaa ciidammada Qalabka Sida ku ammaanay doorka adag ee ay ka qaadanayaan sidii looga hortagi lahaa nabad-diidka, isagoo ku boggaadiyey ciidankii Amniga ee ka hortagay gaari Walxaha Qarxa laga soo buuxiyey xili uu ku sugnaa duleedka caasimadda Muqdisho.
Madaxweyne Xasan Sheekh iyo wefdi uu hoggaaminayo, ayaa ka soo laabtay safar laba maalmood ah oo uu dalka Ethiopia ku tagay, halkaas oo uu uga qeyb-galay shirka Madaxweyneyaasha IGAD ee 29-aad, shirkaas oo Soomaaliya si weyn loogu ammaanay horumarrada ay sameysay iyo guulaha laga gaaray doorashooyinka dalka ka socda.
