Wafdiga uu hogaaminayay Madaxwaynaha dowlad goboleedka Galmudug Cabdikariin Xuseen Guuleed oo ay ka mid ahaayeen xubno ka tirsan maamulka oo maalmihii la soo dhaafay ku sugnaa magaalada Muqdisho ayaa maanta waxaa garoonka diyaaradaha Cadaado ku soo dhaweeyay mas’uuliyiin ka tirsan labada gole Galmudug iyo qaybaha bulshada.
Madaxwaynaha Galmudug oo saxaafadda kula hadlay garoonka diyaaradaha ee Cadaado ayaa sheegay in shirarkii uu Muqdisho uga qeybgalay ay guul ku soo dhamaadeen.
“Waxaa la isla gartay oo qaybaha kala duwan ee Soomaalida iyo beesha caalamkuba, isla garteen labo arrimood, mid waxa ay ahayd wax kororsi ah oo hay’adaha dawlada loo kordhinayo inaysan jirin iyo inaysan dhici karin codayn toos ah duruufaha dalka ka jira awgeed, marka waxa laga arrinsanayo waa labadaas arrimood, wax u dhexeeya in lala yimaado qaab doorasho ku dhici karto, loogana gudbi karo marxaladda hadda lagu jiro” ayuu yiri Madaxweynaha Galmudug.
Mudane Cabdikariin Xuseen Guuleed ayaa wadaxaajood ugu baaqay maamulka Ahlusunna ee Dhuusamareeb, si ay qeyb uga noqdaan dhismaha dowlad goboleedka Galmudug.
“Waxaan rabaa inaan baaq nabadeed u jeediyo culimaa’udiinka Ahlusunna waljamaaca, oo aan leenahay wadahadalka Galmudug ay ku baaqday inay ajiibaan, nabadana ay qayb ka qaataan, dhismaha dawladnimada iyo xasiloonada dalka iyo deegaanka”. Ayuu hadalkiisa ku daray.
Maxamuud Cabdi Diirshe
