Madaxweynaha Dowlad Goboleedka Galmudug, mudane Axmed Cabdi Kaariye (Qoor-Qoor) iyo wafdi uu hogaaminayo oo ka kooban Wasiirro, Xildhibaanno iyo maamulka degmada Baxdo ayaa gaaray deegaanka Maarsamage ee ku yaalla bariga degmada Baxdo ee gobolka Galgaduud, halkaasย oo looga diyaar garoobay sidii looga sifayn lahaa argagixisada deeegaanka Maarsamage iyo deegaanada hoostaga.
Madaxweynaha Galmudug ayaa warbixin ka dhagestay odayaasha iyo hogaanka ciidanka deeganka oo ah shacab iskood isku abaabulay kuwaas oo u diyaar garoobay la dagaallanka kooxda argagagixisada ee caadeestay gumaadka barimagaydada, waxayna sheegeen odayaasha in ay diyaar u yihiin in ay ku jihaadaan argagixisada duullaanka ku ah dhiigga iyo hantida Ummadda Soomaaliyeed.
Wasiirka Wasaaradda Gargaarka iyo Maareynta Musiibooyinka Galmudug ayaa sheegay in Wasaaradaha qaabilsan arrimaha beni’aadaannimada ay dadka deegaanada ay gaarsiin doonaan gargaar dhankasta leh, waxuuna baaq u diray hay’adaha arrimaha gargaaka inay dadka deegaannada abaarta iyo colaada ka jirto ay soo gaaraan.
Mudane Axmed Cabdi Kaariye oo la hadlay odayaasha iyo dadka deegaanka ee iskood isku abaabulay ayaa ku bogaadiyay dadka deegaanka ee sida geesinimada leh ay ugu diyaar garoobeen la dagaallanka argagixisada arxan laawayaasha ah, wuxuuna intaas ku daray in dowladdu ay garab taagantahay had iyo goor dadka shacabka ah ee u’istaagay inay iska dulqaadaan cadawga nolosha u diidan ee mar walba maleegaya dhagarta ka dhanka ah shacabka.
