Madaxweynaha dowlad gobaleedka Galmudug Cabdi Xasan Cawaale (Qeybdiid) iyo mas’uuliyiin kale oo ka tirsan golaha wasiirada maamulka ayaa ka qeyb galay munaasabad lagu xusayay maalinta xuquuqul insaanka aduunka oo ku beegnayd 10 Decembar taas oo maanta lagu qabtay magaalada Galkacyo ee xarunta Dowlad Gobaleedka Soomaaliyeed ee Galmudug.
Munaasabada oo aheyd mid ay soo agaasintay wasaarada haweenka iyo xuquuqul insaanka dowlad gobaleedka Galmudug ayaa waxaa ugu horeyn ka hadlay wasiirada wasaarada haweenka iyo xuquuqul insaanka dowlad gobaleedka Galmudug Sahro Maxamed Cali (Zahro Lo”le) oo iyadu sheegtay in ka wasaarad ahaan ay xilgaara iska saareen dhowrista xuquuqul insaanka isla markaana ay wasaaradu waday tan iyo markii ay hogaanka uqabatay barnaamijyo ku aadan sidii bulshada loogu wacyi galin lahaa ka shaqeeynta ilaalinta xuquuqda uu leeyahay ruux kasta iyo ka hortagida xadgudbyada loo geeysto guud ahaan haweenka Soomaaliyeed meel kasta oo ay joogaan.
Madaxweynaha dowlad gobaleedka Galmudug mudane Cabdi Xasan Cawaale (Qeybdiid) oo munaasabada soo xiray ayaa ugu horeeyn sheegay in maamulkiisu uu markasta xil gaar ah uu iska saarayo dhowrista xuquuqul insaanka taasoo uu xuusay in ay tahay qodab dastuuri ah kuna xusan dastuurka uu leeyahay Maamulka uu hogaanka u hayo ugu danbeeyna madaxweynaha Galmudug ayaa ugu baaqay guud ahaan shacabka Galmudug in ay noqdaan bulsho u taagan markasta ilaalinta iyo dhowrista xuquuqul insaanka taasoo uu ku tilmaamay in ay tahay tan kaliya ay ku gaari karaan horumar Sawir Qaade C/risaaq Maxamed Axmed Galkacyo.
