Wasiirka Wasaaradda Gaadiidka iyo Duulista Hawada Xukuumadda Federaalka Soomaaliya, Fardowsa Cismaan Cigaal oo uu weheliyay Maareeyaha Guud ee Hay’adda Duulista Rayidka Soomaaliyeed, Mudane Axmed Macallin Xasan ayaa kulan heerkiisu sarreeyay magaalada Nairobi kula qaatay Madaxweynaha Golaha Hay’adda Duulista Rayidka Adduunka (ICAO), Mudane Salvatore Sciacchitano, Xoghayaha Guud ee ICAO,Juan Carlos Salaza iyo Agaasimaha Xafiiska Horumarinta iyo Hirgelinta ICAO, Jorge Vargas.
Wada-hadalka labo geesoodka ah ayaa diirradda lagu saaray mashaariicda horumarinta ee hannaanka Duulista Rayidka Soomaaliyeed, guulaha laga gaaray farsamada iyo iskaashiga guud.
Maareeyaha Guud ee Hay’adda Duulista Rayidka Soomaaliyeed , Mudane Axmed Macallin Xasan ayaa kulanka ku soo bandhigay warbixin guud oo la xiriirta guulaha la gaaray oo ay ku caddahay sida ay Soomaaliyeed waqti kooban ku gaartay heerka u sarreeya ee maamulka iyo la socodka hawada iyo sida ay uga go’antahay in la xoojiyo dadaallada horumarinta leh. Waxaa kalo uu soo qaaday inay guul weyn u tahay Soomaaliya muddada yar Hay’adda Duulista Rayidka ku gaartay heerka u sarreeya ee dhinacyada qalabka, farsamada iyo shaqaalaha.
Madaxweynaha Golaha Hay’adda Duulista Rayidka Adduunka (ICAO), Mudane Salvatore Sciacchitano ayaa dhankiisa boggaadiyay guulaha la gaaray , wuxuu si cad u sheegay inay Soomaaliya u arkaan tusaalaha horumar degdeg leh ee laga gaaro hannaanka Duulista Rayidka, wuxuu ku dhaaraday xiriirka dheer ee uu la leeyahay Soomaaliya oo ka soo billaabanaya xilliga gumeysta ah, isagoo caddeeyay inay ICAO labo-laabayso taageerrada iyo iskaashiga Soomaaliya.
“Soomaaliya waxay noogu diiwaangashantahay inay tusaale adduunka ugu tahay horumar si dhaqso leh looga gaaro nidaamka Duulista Rayidka.” ayuu yiri Madaxweynaha Golaha ICAO oo intaa ku daray “ Waxaan dooneyna doorashada Golaha ICAO ee dhacaysa 2025 inay Soomaaliya soo xaadirto si halkaa dunidda aan ugu soo bandhigno iyadoo ka soo gudubtay hubinta (Audit).”
Gabagabadii, Wasiirka Wasaaradda Gaadiidka iyo Duulista Hawada Xukuumadda Federaalka Soomaaliya, Fardowsa Cismaan Cigaal ayaa uga mahadcelisay hoggaanka sare ee ICAO , dadaalladii iyo taageerradii ay siiyeen Soomaaliya ee lagu gaaray isbeddelka horumarka leh, iyadoo xaqiijisay inay dadaal ku bixin doonaan dhammeystirka hubin (Audit), sida ay Soomaaliya ugu gudbi lahayd iyo horumarinta dhinacyada mudnaanta leh.
