Madaxweynaha Dowlad Goboleedka Hirshabeelle Mudane Cali Guudlaawe Xuseen ayaa caawa hoyga uu ka degan yahay magaalada Muqdisho kulan afur ah ugu sameeyay Ra’isul Wasaaraha Xukuumada Federaalka Soomaaliya Mudane Maxamed Xuseen Rooble, Madaxweynaha Dowlad Goboleedka Galmudug Mudane Axmed Cabdi Kaariye “Qoorqoor” Midowga Musharixiinta iyo xubno Wasiiro ah.
Kulankaan waxaa diiradda lagu saarayay amniga iyo xasilinta magaalada Caasimadda ee Muqdisho, sidoo kale kulankaan waxaa looga hadlay Arrimaha Doorashooyinka iyo sida lagama maarmaanka ay u tahay qabsoomidda Doorashoooyin la isla ogolyahay oo si nabdoon ku dhaca.
Dowlad Goboleedka Hirshabelle waxay soo dhoweyneysaa shirka uu Ra’iisul Wasaaraha Xukuumada isugu yeeray Dowlad Goboleedyada, waxaana marwalba ay diyaar u tahay ka shaqeynta danta dalka iyo dadka Soomaaliyeed.
