Madaxweynaha Dowlad Goboleedka Hirshabeelle Mudane Cali Cabdullaahi Xuseen Guudlaawe ayaa maanta kulan kula qaatay magaalada Muqdisho Safiirka Dowladda Talyaaniga u fadhiya Soomaaliya Ambassador Alberto Vecchi.
Kulankaan ayaa looga hadlay Arrimaha Fatahaadaha, Amniga iyo Fulinta Mashaariicyo horumarineed oo wax tar u leh bulshada Deegaannnada Hirshabeelle.
Madaxweynaha Hirshabeelle ayaa Ambassador Alberto Vecchi Safiirka Dowladda Talyaaniga ee Soomaaliya la wadaagay xaaladaha fatahaadda ee hada taagan iyo sidii loo caawin lahaa dadkii ku barakacay fatahaadaha Webiga Shabeelle oo ay ku barakaceen in kabadan toban kun oo qoys, sidoo kale kulankaan waxaa looga hadlay sidii looga wada shaqeyn lahaa xal u helida Arrimaha Fatahaadaha oo ku soo laab laabtay deegaannada Hirshabeelle.
Kulanka ayaa inta uu socday waxaa la iskula soo qaaday Dhismaha iyo tababaridda ciidamada booliiska, Daraawiishta, fulinta mashaariicyo horumarineed oo wax tar u leh bulshada sida Cusbitaalo iyo adeegyo kale oo muhiim ah iyo Dhismooyinka Garoomada Diyaaradaha magaalooyinka, iyagoo balan qaaday in sanadka cusub ay magaalada Beledweyne nooga dhisi doonaan Garoon Caalami ah.
Madaxweynaha dowlad Goboleedka Hirshabeelle ayaa uga mahadceliyay Dowladda Talyaaniga taagerada ay dadka Soomaaliyeed la garab taaganyihiin, gaar ahaan shaqooyinka ay ka wadaan magaalada Beledweyne ee xarunta Ganacsiga Hirshabeelle.
