Maxadweynaha Dowlad Goboleedka Hirshabelle Mudane Maxamed Cabdi Waare ayaa maanta Guddoonsiiyay matooro loogu talo galay in lagu horumariyo beeraleyda Hirshabelle, waxaana Maamulka ka gacansiiyay Hey’adda ARC kaddib munaasabad ka dhacday hoolka shirarka magaalada Beledweyne, waxaana munaasabadda goob joog ka ahaa xubno ka tirsan labada gole ee dowladda Hirshabebelle, Mas’uuliyiinta heer gobol iyo heer degmo iyo qaar ka mid ah beeraleyda gobolka Hiiraan.
Mudane Maxamed Cabdi Waare oo munaasabadda ka hadlay ayaa ku dheeraaday ka sheekeynta muhiimada ka faa’ideysiga wax soo saarka beeraha Hirshabelle, isagoo xusay in barnaamijkani uu qeyb ka yahay qorshaha lagu horumarinayo beeraleyda ku nool deegaannada Hirshabelle.
“Barnaamijkani runti waxa uu qeyb ka yahay mashaariicda lagu xoojinayo adkeysiga beeraleyda ay u adkeystaan abaarooyinka, fatahaadaha si ay u soo saartaan wax soo saarka, gaar ahaan wax soo saarka la iib geeyo ay qudaartu ugu badantahay, runtii barnaamijkani waxa uu horseed u yahay barnaamij weyn oo u jeedadiisu ay tahay in nolosha beeraleyda Hirshabelle wax looga bedelo qeyb ka mid ah, barnaamijyadaas waxaa maalgalinayo deeq beexiyayaal kale duwan, qeybta ugu weyn waa qeybta lagula tacaalayo ee ka hortagayo fatahaadaha ee mar walba soo noqdo” Ayuu yiri Madaxweyne Waare.
Madaxweynaha Dowlad Goboleedka Hirshabelle Mudane Maxamed Cabdi Waare oo sii hadlay ayaa u mahaceliyay hey’ada ka gacan siisay maamulka qalabkani oo muhiimad gaar ah ugu fadhiyo beeraleyda Soomaaliyeed gaar ahaan beeraleyda Hirshabelle, waxaana uu xusay in muhiimad gaar ah ay ugu fadhiso kor u qaadida xirfadda iyo aqoonta beeraleyda ayna ku howlanyihiin in laga faa’ideysto wax soo saarka dalagyada beeraha.
Maamulka hirshabelle ayaa qorsheeyay 1,535 matooro in looga faa’ideeyo beeraleyda Hirshabelle, iyadoo beeraleyda magaalada Jowhar horey loo guddoonsiiyay matooro sidaan oo kale, waxaana maanta Madaxweynaha Hirshabeelle uu gacantiisa ku Guddoonsiiyay 375 ka mid ah beeraleyda magaalada Beledweyne iyo deegaannada hoosyimaada.
