Madaxweynaha Dowlad Goboleedka Hirshabelle Cali Cabdullaahi Cosoble ayaa magaalada Beledweyne kulan kula qaatay, Xubno ka tirsan Qaramada Midoobay, iyadoo uu kala hadlay arrimo kale duwan oo la xiriira wax ka qabashada baahiyaha ka jira deegaanada Hirshabelle.
Kulanka ayaa waxaa Madaxweynaha Hirshabeelle Ku wehlinayay qaar ka mid ah Golaha Wasiirada Hirshabelle, waxaana kulanka uu ku bilowday isbarasho Wasiirada Hirshabelle iyo Saraakiisha Qaramada Midoobay, iyagoo balanqaaday in ay la shaqeyn doonaan Xukuumadda Cusub ee maamulka.
Madaxweynaha Dowlad goboleedka Hirshabelle Cali Cabdullaahi Cosoble ayaa warbixin ka dhageysay Saraakiisha Qaramada Midoobay, ee ku Aadan Waxqabadkooda, iyo qorshayaasha uga degsan mashaariic fulinta deegaanada Hirshabelle.
Cali Cabdullaahi Cosoble ayaa ka dalbaday Xafiiska Qaramada Midoobay ee Beledweyne in ay muujiyaan doorkooda kaga Aadan dib u dhiska iyo horumarinta Guud ahaan Deegaanada Hirshabeelle, iyo in ay xaliyaan Cabashada dadka Deegaanka oo ay si wanaagsan ula shaqeeyaan, waxaana uu ka dalbaday Saraakiishani Qaramada Midoobay in ay si Dhow ula shaqeeyaan Hey’adaha Dowladda Hirshabelle kaalina ay ka qaataan, sidii loo tayeyn lahaa.
Intaasi kaddib ayaa Saraakiisha Qaramada Midoobay waxa ay soo dhoweeyeen Wasiirada Cusub ee Dowladda Hirshabeelle, waxaana ay balanqaadeen in Dowladda Hirshabelle ay si wanaagsan ula shaqeyn doonaan, ayna u qorsheysantahay dhowaan in ay mashaariicyo ay ka fuliyaan
Degmooyinka Hirshabelle sida Jowhar iyo Degmada Jalalaqsi, waxaana ay sheegeen in ay socdaal ku tagi doonaan Magaalada Jowhar mar dhow.
Maalin kaddib oo maalinta Arbacada ah ayuu qorshuhu yahay mar kale in Madaxweynaha Hirshabeelle Cali Cabdullaahi Cosoble iyo Qaramada Midoobay in kulan midkan ka balaaran ay kulmaan islamarkaana ay kaga wada hadlaan dar dargalinta dib u dhiska iyo horumarinta Hirshabeelle, iyo sidii loo caawin lahaa dadka abaaraha la daalaa dhacaya.
