Madaxweynaha Jamhuuriyadda Federaalka Soomaaliya Mudane Xassan Sheekh Maxamuud iyo wafdiga la socda ayaa kulamo gaar gaar ah la qaatay Wasiirada, Maaliyadda, Gaashandhiga, Warfaafinta, Beeraha iyo arimaha diinta ee dalka Sacuudiga, iyadoo kulamadaasi looga hadlay sidii ay wada shaqeyn buuxda u dhexmari laheyd labada wadan.
Wasiirka maaliyadda dalka Sucuudiga ayaa sheegay in dowladiisu ay Soomaaliya ka taageeri doonto dhanka miisaaniyadda iyo kaabayaasha dhaqaalaha.
Sidoo kale kulamadan ayaa looga hadlay iskaashi buuxa oo laga yeesho arimaha argagaxisada beeraha iyo wada shaqeyn dhab ah oo dhexmarta labada dowladood.
Wasiirka wafaafinta dhaqanka iyo dalxiiska ee Xukuumadda Federaalka ah ee Soomaaliya Mudane Maxamed Cabdi Xayir Maareeye ayaa dhigiisa wadanka Sucuudiga waxa uu kala hadlay sidii loo taageeri lahaa Warbaahinta Qaranka,iyo in moqfif mideysan laga qaato faafinta afkaaraha qarbudaada ku saleysan iyo in laga hortago.
Wasiir Maareeye ayaa sidoo kale u sheegay sida ay Wasaaradda Warfaafinta Soomaaliya ay diyaar ugu tahay inay qeyb ka qaadato wacyigelinta bulshada gobolka, gaar ahaan in dowladda Sucuudigu tababaro iyo qalabeyn ka caawiso Wasaaradda Warfaafinta, Dhaqanka iyo dalxiiska Soomaaliya.
Madaxweynaha iyo wafdigiisa ayaa soo geba gabeeyay booqashadii ay ku joogeen dalka Sucuudiga.
