Madaxweynaha Jamhuuriyadda Soomaaliya, Mudane Xasan Sheekh Maxamuud, ayaa kormeer ku tagay xeryaha ciidammada Xoogga dalka ay ku leeyihiin duleedka magaalada Kismaayo.
Madaxweynaha, kormeerkiisu waxa uu la xiriiray sidii uu u dhiiragelin lahaa ciidammada ku sugan deegaannada Jubbalaan ee xeryaha ku leh duleedka Kismaayo, kuwaas oo qaarkood dhammeystay tababarka isku dhafka ciidammada Xoogga dalka oo lagu bilaabay qeybta 43-aad ee Jubbalaan ka howl-gasha.
Taliyaha qeybta 43-aad ee ciidammada Xoogga dalka Soomaaliyeed, ayaa madaxweynaha warbixin buuxda ka siiyey marxaladda ciidammada ku sugan yihiin iyo tababarka isku dhafka ay qaateen, waxa uu sheegay in weli ciidanku u baahan yahay in la dhammeystiro waxyaabaha ka haray baahidooda dhanka shaqada.
Madaxweynaha J. Soomaaliya, Mudane Xasan Sheekh Maxamuud, ayaa ugu hambalyeeyey ciidanka xeryaha ku leh Ex Jaamacaddii hore ee Kismaayo, tababarrada ay sida wanaagsan u qaadeen, waxa uu ku dhiirageliyey diyaar-garowga ay u galeen in ay dalka ka difaacaan kooxaha Nabadda diiddan.
Madaxweynaha Soomaaliya, ayaa sheegay in dowladdu ay xog ogaal u tahay xaaladda ay ciidanku ku sugan yihiin, waxa uu intaa raaciyey in lagu dadaali doonno dhammeystirka baahida ciidanka dhan walba iyadoo la eegayo awoodda dowladooduย leedahay, laakiin ahmiyadda koobaad la siin doono ciidammada Qalabk Sida.
Sidoo kale Madaxweyne Xasan Sheekh Maxamuud oo ay wehliyaan wasiirka Gaashaandhigga Soomaaliya iyo saraakiisha ciidammada, ayaa kormeer kale ugu tagay ciidammo cusub oo uu tababar uga socda isla duleedka magaalada Kismaayo, madaxweynaha ayaana hadal kooban oo dardaaran iyo dhiiragelin ah u jeediyey ciidankaasi.
