Madaxweynaha Dowlad Goboleedka Jubbaland Mudane Axmed Maxamed Islaam ayaa maanta Shir gudoomiyay kulanka golaha Wasiirada oo lagaga hadlayay howlgallada dalka lagu xoraynayo, dardar galinta mashaariicda socda iyo qodobo kale.
Golaha ayaa bogaadiyay howlgallada ay wadaan Ciidamada kala duwan ee Jubbaland iyo xoogga dalka, kuwaas oo dhabar jab xoog leh lagu gaarsiiyay Kooxda Al-Shabaab.
Ciidamada Xoogga Dalka iyo kuwa Jubbaland ayaa maanta la wareegay Degmada Xagar ee gobolka Jubbada Hoose, iyadoo halkaas khasaare kala duwan lagu gaarsiiyay kooxaha Khawaariijta ah.
Sidoo kale waxaa kulanka lagaga hadlay dardar galinta mashariicda Dowladda ee socda sidii qiimayn buuxda loogu samayn lahaa isla markana loo hubin lahaa gaba gabada inay u fuleen sidii loogu tala galay iyo bilowga mashariicda cusub sidii ay u noqon lahayeen Kuwo taabo gala.
Golahu waxaa kale oo uu ka hadlay sidii mashariicda kala duwan ee Dowlad Goboleedka Jubbaland loo gaarsiin lahaa gobolka Gedo isla markana bulshada deegaanka ay u heli lahayeen adeegyada kala duwan iyo shaqada laamaha kala duwan ee Dowladu ay bulshada u hayaan.
