Madaxweynaha Dowladda Koonfur Galbeed, Mudane Cabdicasiis Xasan Maxamed Laftagareen, ayaa saxiixay Sharciga Naafada Koonfur Galbeed, oo ay diyaarisay Wasaaradda Haweenka ee Dowladda Koonfur Galbeed. Munaasabadda saxiixa sharciga oo ka dhacday magaalada Baydhabo, waxaa goob-joog ka ahaa Wasiirka Haweenka Marwo Shamsa Maxamed Yarow, Agaasimaha Madaxtooyada Mudane Cabdifataax Mahad, iyo madax ka socotay Qaramada Midoobay, gaar ahaan Xafiiska Xuquuqul Insaanka.
Saxiixitaanka sharcigan ayaa muhiimad weyn u leh kor u qaadista xuquuqda naafada ee Koonfur Galbeed, iyadoo sharcigan uu dhiirrigelinayo daryeelka, xuquuqda, iyo fursadaha ay naafadu u baahan tahay. Sharcigan ayaa sidoo kale ka turjumaya dadaalka Dowladda Koonfur Galbeed ee ku aaddan taageerada naafada iyo sidii loo abuuri lahaa deegaan u qalma dadka naafada ah, iyadoo la tixgelinayo baahiyahooda gaarka ah.
Marwo Shamsa Maxamed Yarow, Wasiirka Haweenka, ayaa ka warbixisay ahmiyadda sharcigan, waxayna sheegtay in uu yahay tallaabo weyn oo horumarineed oo ka turjumaysa siyaasadda Dowladda Koonfur Galbeed ee ku aaddan xaqiijinta xuquuqda dadka naafada ah. Wasiirku waxa uu sidoo kale tilmaamay in sharcigan uu fursad siinayo dadka naafada ah si ay uga qeybqaataan bulshada, kana faa’iidaystaan fursadaha caafimaad, waxbarasho, iyo shaqo.
Agaasimaha Madaxtooyada Mudane Cabdifataax Mahad ayaa soo dhoweeyay saxiixa sharcigan, isagoo muujiyay in ay tani tahay tallaabo muhiim ah oo lagu taageerayo naafada dalka. Madaxda ka socotay Qaramada Midoobay, gaar ahaan Xafiiska Xuquuqul Insaanka, ayaa sidoo kale si weyn u bogaadiyay tallaabada Dowladda Koonfur Galbeed, waxayna ku tilmaameen inay tahay horumar weyn oo loogu talagalay xaqiijinta xuquuqda naafada iyo sii wadista dadaallada lagu xaqiijinayo sinnaanta bulshada.
Saxiixitaanka sharciga Naafada ee Koonfur Galbeed ayaa muujinaya ballanqaad cusub oo ku saabsan ilaalinta iyo horumarinta xuquuqda dadka naafada ah, iyadoo sidoo kale la dhisayo qaab-dhismeedyo siyaasadeed iyo sharci oo dadka naafada ah fursad u siinaya inay si buuxda uga qaybqaataan dhammaan hawlaha bulshada.
