Madaxweynaha dowlad Goboleedka Koonfur Galbeed Soomaaliya Mudane Cabdicasiis Xasan Maxamed (Lafta gareen) ayaa maanta dhagax dhigay xarunta maktabadda Maamulka Koofur Galbeed, taas oo laga hirgelin doono magaalada Baydhabo ee xarunta Gobolka Baay.
Maktabadda cusub oo ay dhismaheeda iska kaashan doonaan Aqoonyahanno iyo ganacsato ka soo jeeda Koonfur Galbeed ayaa ujeedkeedu yahay sidii ay maktabadda u noqon lahayd hoyga cilmiga.
Prof Cabdi Maxamed Kuusow ayaa sheegay in maktabaddan kaalin mugleh ay ka qaadan doonto sare u qaadidda aqoonta, loona baahanyahay in cidkasta ay ka qeyb qaadato dhismaha maktabadda.
Qaar ka mid ah dadkii ka qeyb galay munaasabadda lagu dhagax dhigayay maktabadda ayaa sheegay inay soo dhaweynayaan hirgelinta maktabad cilmiga laga kororsado.
Madaxweynaha dowlad Goboleedka Koonfur Galbeed Soomaaliya Mudane Cabdicasiis Xasan Maxamed (Lafta gareen) ayaa tilmaamay in la garab istaago dhallinta is xilqaamtay ee dooneysa inay hirgeliyaan Maktabad, isagoo baaq u diray Jaaliyadda ka soo jeedda Koonfur Galbeed inay gacan ka geystaan dhismaha maktabadda si loo horumariyo waxbarashada.
