Kulankani oo ahaa mid dhex maray Madaxweynaha Maamulka Galmudug iyo Naafada ku nool degmada Gaalkcyo ayaa waxa uu ka dhacay xarunta guriga Hooyooyinka Galmudug, waxaana kulankani soo qaban-qaabiyay Wasaarada Gargaarka iyo Bini’adnimada Iyo Daryeelka Naafada Maamulka Galmudug iyo Hay’ada Ileys Women Development.
Kulankani inta uu soday waxaa lagu falan-qeeyay sidii wax loogu qaban lahaa dadka Naafada ah ee xiligaan ku nool degmada Gaalkcyo ee gobolka Mudug.
Qaar ka mid ah dadka Naafada ah oo hadlay ayaa waxa ay sheegeen in xiligan ay heysato dhibaato dhanka Nolosha ah ayagoona intaasi raaciyey in aysan jirin cid xil iska saartay wax u qabashadooda isla markaana ay aad ugu dulman yihiin deegaanka waxa ayna Madaxweynaha ka codsadeen in wax uu u qabto.
Wasiirka Gargaarka iyo Bini’adnimada Iyo Daryeelka Naafada Maamulka Galmudug Mudane Shire Xirsi Maxamuud oo madasha ka hadlay ayaa baaq u diray Hay’adaha taakuleeya dadka taagta daran, waxuuna ugu baaqay inay si deg-deg ah wax loogu qabto dadkaasi ku dhibaateysan gudaha Gaalkacyo.
Madaxweynaha dowlad goboleedka Soomaaliyeed ee Galmudug Cabdikariim Xuseen Guuleed oo madasha ka hadlay ayaa balan qaad u sameyey dadkii Naafada ahaa ee maanta uu kulan la qaatay wax uuna sheegay in dowladiisu ay u sameyey dadka Naafada iyo Barakacayaasha ah Wasaarad ku shaqo leh arimahaas wax uuna tilaamay in ay wax u qabandoonto dadka taagta daran ee ku nool deegaanada Galmudug.
Si kastaba ha ahaatee, waa markii ugu horeysay oo Madaxweynaha Maamulka Galmudug uu kulan la yeesho qaar ka mid ah dadka Naafadda ah ee ku nool deegaanada Galmudug, waxuuna kulankan noqday mid si wayn ay u soo dhaweeyeen dadka Naafadda ah oo sheegay inaysan wali la kulmin Madax la mid ah Madaxweyne Cabdikariim Xuseen Guuleed.
