Madaxweynaha maamulka Koonfur Galbeed ee Soomaaliya Mudane Shariif Xasan Sheekh Aadan iyo wafdi uu hogaaminayo oo kormeer ku tegay magaalada Xudur ee xarunta Gobolka Bakool, halkaasi oo uu kula kulmay qeybaha bulshada.
Wefdiga waxaa kaloo ka mid ahaa Xildhibaanno ka tirsan Baarlaamanka Federaalka ah ee Soomaaliya, waxaana ay soo kormeereen xarumaha caafimaadka, waxbarashada iyo goobo kale oo muhiim ah oo ay ka mid ahayd xarun lagu tababarayay ciidamo ka tirsan maamulka Koonfur Galbeed.
Mudane Shariif Xasan Sheekh Aadan oo kulan la qaatay qeybaha bulshada, saraakiisha ciidamada iyo maamulka Gobolka ayaa ku booriyay inay xoojiyaan wada shaqeynta dhexdooda ah, waxaana uu intaa ku daray in ciidamada ay joogteyn doonaan howlgallada ka dhanka ah maleeshiyada Al-Shaabaab ee qeybo ka mid ah deegaannada maamulkaasi ku sugan.
Madaxweynaha maamulka Koonfur Galbeed ee Soomaaliya oo dadweyne kula hadlayay ayaa u sheegay in maamulkiisa uu xoogga saari doono dib u soo celinta adeegyada aas aasiga u ah bulshada, waxaana uu ka codsaday in ay la shaqeeyaan ciidamada.
Wafdiga Madaxweynaha Maamulka Koonfur Galbeed ee dalka ayaa maanta gelinkii dambe dib ugu soo laabtay magaalada Baydhabo ee xarunta Gobolka Baay, halkaasi oo ay ku soo dhaweeyeen qeybaha bulshada iyo maamulka gobolka.
Sawir Qaade:- Maxamed Xasan Cabdiraxmaan (Xudur)
