Madaxweynaha Maamulka Puntland Dr.Cabdiweli Maxamed Cali Gaas ayaa maanta aqalka madaxtooyada Puntland ee Garoowe ku qaabilay Madaxa xafiiska Bankiga aduunka ee Soomaaliya Mr.Hugh Riddel iyo wadi uu hogaaminayey.
Ka qeybgalka kulanka ee dhanka Puntland waxaa madaxweynaha maamulkaasi ku wehlinayay Wasiirka Maaliyadda Puntland Shire Xaaji Faarax, Wasiiru dowlaha madaxtooyada iyo xiriirka caalamiga ah ee Puntland Maxamed Cabaas Cumar iyo Agaasimaha guud ee macdanta iyo shidaalka ee maamulkaasi Puntland Ciise Dhoolawaa.
Kulan gaar ah oo madaxweynaha Maamulka Puntland Mr Gaas la qaatay mas’uuliyiintaasi ayaa waxaa uu ku saabsanaa kheyraadka ku jira Puntland sidii looga faa’iidaysan lahaa, bankiga aduunkuna uu gacan uga siin lahaa Puntland sidii loo soo saari lahaa kheyraadkaasi.
Mr Gaas ayaa sheegay in Puntland ay ku jiraan kheyraad fara badan oo u baahan in looga faa’iideeyo shacabkeeda, waxaana uu tilmaamay in ay soo dhaweynayaan cidkasta oo kheyraadka ku jira Puntland soo saaristeeda gacan mug leh ka geysanaysa.
Wafdiga ka socday Bankiga aduunka ayaa dhankooda sheegay inay diyaar u yihiin in ay isgarab taagaan Maamulka Puntland gacana ay ka siiyaan soo saarista kheyraadka dabiiciga ah ee Puntland.
Sidookale Bankiga Aduunka ayaa ayaa waxaa ay sheegeen in ay damaanad qaad buuxa siin doonaan shirkadaha maalgashiga iyo shirkadaha soo saara kheyraadka dabiiciga ah kuna dhiirigelinayaan in Puntland ka howlgalaan.
Madaxweynaha Maamulka Puntland Dr.Cabdiweli Maxamed Cali Gaas ayaa waxaa uu dadaal xoogan ugu jiraa sidii shacabka reer Puntland looga faa’iideynlahaa kheyraadka dabiiciga ah ee eebe ku manaystay Puntland, waana talaabo muhim ah oo ay Puntland horay u qaaday mudadii uu hogaanka Puntland hayey C weli Gaas.
