Madaxweynaha maamulka Puntland Dr.Cabdiweli Maxamed Cali “Gaas” ayaa gelinkii dambe ee maanta oo ay taariikhdu tahay 9-4-2015 ka qeyb-galay aas qabuuraha magaalada Garoowe ee caasimadda Dawladda Puntland loogu sameeyey Allaha u naxariiste marwadii Dr.Cabdiraxmaan “Faroole” Madaxweynihihii hore ee Puntland Marxuumad Aamino Abiib.
Aaska ayaa waxaa sidookale ka soo qeyb-galay Madaxweyne ku xigeenka maamulka Puntland Eng. Cabdixakiin Cabdullaahi Cumar Camey, Gudoomiyaha Baarlamaanka Puntland Siciid Xassan Shire, Wasiirro iyo xildhibaanno ka tirsan maamulka Punttland, Madaxweyne ku xigeenki hore ee Puntland Cabdisamad Cali Shire, Isimo, waxgarad, saraakiil ciidan iyo masuuliyiin kale.
Madaxweynaha maamulka Puntland Dr.Cabdiweli Maxamed Cali Gaas ayaa u tacsiyeeyey madaxweynihii hore ee Puntland Dr.Cabdiraxmaan Shiish Maxamed “Faroole”, dhammaan eheladii iyo shacabka reer Puntland oo ay ka baxday marxuumad Aamino Abiib oo ku geeryootay maanta magaalada Garoowe.
” Anigoo ku hadlaya magaca Puntland waxaan si gaar ah ugu tacsiyeeynayaa eheladii ay ka dhimatay marxuumad Aamino Abiib gaar ahaana Madaxeweynihii hore ee Puntland Dr.Cabdiraxmaan Shiikh Maxamed Faroole, Alle ha u naxariisto marxuumada samir iyo iimaan buuxana ilaahay haynaga siiyo ” Ayuu yiri Madaxweyne Gaas.
” Ilaahay waxaan ka rajaynayaa meesha ay joogtay meel ka kheyr badan in uu geeyo intii ay ka dhimatayna ka samir siiyo ” Ayuu hadalka raaciyey Dr.Cabdiweli Maxamed Cali Gaas.
Madaxweyne ku xigeenka maamulka Puntland Eng.Cabdixakiin Cabdulaahi Xaaji Cumar Camey ayaa marxuumad Aamino Abiib Alle uga baryey in janadiisa fardowsa uu ka waraabiyo qabrigana uu u waasicyo.
Gudoomiyaha Baarlamaanka Puntland Siciid Xassan shire ayaa sidoo kale isna ka tacsiyeeyey geerida marxuumada, waxaana uu Alle uga baryey in dambigeeda uu dhaafo, meel wanaagsan oo aduunka uga kheyr roona uu geeyo.
