Mudanayaasha Baarlamaanka Maamul goboleedka Soomaaliyeed ee Puntland ayaa soo xaadiray kullanka maanta, waxaana Goob joog ka ahaa Gudoomiyaha Baarlamaanka Puntland Siciid Xaasan Shire , Labada Guddoomiye ku xigeen ee Baarlamaanka , Wasiiro iyo Bahda warbaahinta.
Gudoomiyaha Baarlamaanka Dawlad goboleedka Puntland Siciid Xassan Shire oo ugu horeyn ka hadlay kullanka ayaa sheegay in maanta uu Madaxweynuhu ku yimi codsigii baarlamaanka ee shalayto xildhibaanadu codsadeen in madaxweynaha ay weydiiyaan su’aallo, kuwaasi oo la xiriira howlaha Maamulka ee socda.
Madaxweynaha Dawlad goboleedka Puntland Dr.Cabdiweli Maxamed Cali Gaas ayaa dhankiisa dhammaan mudanayaasha baarlamaanka ee Maamulka uga mahadceliyey sida ay ugadanayaan waajibaadka saaran, una sheegay in uu diyaarna u yahay inay weydiiyaan su’aalo .
Mudanayaasha Baarlamaanka ayaa madaxweynaha weydiiyey su’aalo, kuwaasi oo la xiriiray xaaladda guud ee dalka , barnaamjyada horumarineed , waxayna ku bogaadiyeen Madaxweynaha iyo xukuumadiisa dedaalka horumarineed ee ka soconaya guud ahaan Puntland oo maanta qaaday dhabada horumarka iyo wanaaga.
Dhinaca kale Mr Gaas ayaa qiray in Gobalada Puntland dhammaantood uu maamulka ka hayo howlo muhiim ah oo la xiriirta horumarka , waxaana uu sheegay in Gobalada dhiman ee uusan tagin ay u qorshaysan tahay in uu tagayo wakhti dhow.
