Madaxweynaha jamhuuriyadda federaalka Soomaaliya mudane Xasan Sheekh Maxamuud ayaa maanta ka qeybgalay munaasabadda xuska sanadguurada 43 ee ka soo wareegtay markii la qoray Afka Soomaaliga oo lagu qabtay Muqdisho.
Madaxweyne Xasan Sheekh Maxamuud ayaa isla maanta xarigga ka jaray xarunta cusub ee xarunta cilmiga dhaqanka fanka iyo suugaanta taasoo lagu qabtay munaasabada xuska sanadguurada 43-aad ee ka soo wareegtay markii la qoray afkeena hooyo.
Munaasabadda Sidoo kale waxaa ka qeybgalay wasiirka waxbarashada, wasiirka warfaafinta dhaqanka iyo dalxiiska, xildhibaano iyo guud ahaan bahda waxbarashada, iyadoo dadkii munaasabadda ka hadlay ay muujiyeen baahida loo qabo in la horumariyo afka Soomaaliga.
Wasiirka waxbarashada Marwo Qadro Bashiir ayaa munaasabadda ka sheegtay in wasaaraddu ay ku dadaali doonto sidii loo xoojin lahaa afka Soomaaliga looguna dhigi lahaa dugsiyada aas aasiga ah ee dalka, waxeyna ku boorrisay bulshada Soomaaliyeed iney gacan ka geystaan horumarinta Afka Soomaaliga.
Wasiirka warfaafinta Dhaqanka iyo Dalxiiska Mudane Maxamed Cabdi Xayir “Maareeye” oo munaasabadda ka hadlay ayaa ku boorriyay wariyayaasha iney bartaan shuruucda ku hadalka iyo qorista afka Soomaaliga muddo sadex bilood ah, wuxuuna ku dheeraaday ahmiyadda uu ummadda Soomaaliyeed u leeyahay horumarinta afkooda hooyo.
Madaxweynaha Jamhuuriyada Federaalka Soomaaliya mudane Xasan Sheekh Maxamuud oo xarigga ka jaray xarunta cusub ee cilmiga dhaqanka fanka iyo suugaanta Soomaaliyeed ayaa sheegay in wadamada dunidu ay ku horumareen afkooda, isagoo xusay in dowladda ay ka go’antahay sidii ay u horumarin laheyd afka hooyo ee Soomaaliga.
Wuxuuna ku booriyay maamulka xafiisyada dowladda in afka Soomaaliga ay siiyaan mudnaanta koobaad laguna qoro dukomentiyada si loo horumariyo, isagoo hoosta ka xariiqay baahida loo qabo in la xoojiyo afka Soomaaliga laguna dhigo dugsiyada waxbarashada.
Madaxweynaha ayaa ugu hambalyeeyay ummadda Soomaaliyeed meel kastoo ay joogaan sanadguurada 43-aad ee ka soo wareegtay xuska maalinta afka hooyo, wuxuuna kula dardaarmay iney sare qaadaan qiimaha afka hooyo ee Soomaaliga.
