Isagoo ka hadlayay kulan lagu soo dhaweynayay oo lagu qabtay magaalada Garoowe ee xarunta u ah gobolka Nugaal ayuu madaxweynaha Jamhuuriyadda federaalka ah ee Soomaaliya mudane Xasan Sheikh Maxamuud waxaa uu soo hadal qaaday arimaha ku saabsan kaalmada dhaqaale ee caalamku uu Soomaaliya siiyo si gaar ah barnaamijka New Deal-ka ee Dunidu sheegtay in Soomaaliya ay ku caawineyso.
Mudane Xasan Sheikh Maxamuud Madaxweynaha Soomaaliya ayaa waxaa uu shegay in barnaamijkaasi qaabka hadda caalamku u wado uusan ahayn qaab Soomaaliya u baahantahay waxaana uu ugu baaqay in si deg deg ah dib u eegis loogu sameeyo .
“Beesha caalamka kaalmadeeda iyo niyad samideeda waa ku mahadsantahay, waana ku amaaneynaa, laakin arrinta la yiraa New Deal-ka waxaan u baahan nahay in si dhab ah dib loogu eego, sida hadda uu yahay ummadda Soomaaliyeed kuma anfaco”ayuu yir madaxweynaha.
Mudane Xasan Sheikh Maxamuud madaxweynaha Jamhuuriyadda ayaa waxaa uu dhinaca kale ka hadlay arimo la xiriira isku dhafka ciidanka qalabka sida ee Soomaaliya oo dhawanahaanba ay dowladda federaalk ah waday dadaalo lagu abuuray ciidan qaran oo isku dhaf ah.
Madaxweynaha ayaa sheegay in dowladda dhexe iyadoo la kaashaneysa dowlad goboleedyada dalka ka dhisan ay dadajineyso howlaha isku dhafka ciidanka.
