WAR SAXAAFADEED
ANSIXINTA BAARLAMANKA EE GOLAHA WASIIRRADA
Muqdisho, Madaxweynaha Jamhuriyadda Federaalka Soomaaliya, Mudane Xasan Sheekh Maxamuud ayaa taageeray Golaha Wasiirrada ee uu soo dhisey raiisul wasaaraha, iska markaana uu ansixiyey Baarlamanka Federaalka.
“Waan soo dhoweynayaa magacaabista uu sameeyey Ra’iisul Wasaaraha iyo codka kalsoonida ee xubnahaasi cusub ay ka heleen baarlamanka.’’
Madaxweynaha ayaa sidoo kale xusey in walow ay jireen arrimo culus, haddana in horumar la taaban karo la sameeyay.
“Aad ban ugu faraxsanahay in caqabado badan oo la soo marey toddobaayadii la soo dhaafey ka sokow, aaney weli meesha ka bixin xawligii aan ku wadney hawlaha aan qaranka u hayno oo weli halkooodii ka sii socda. Arrimo badan oo muhiim ah, isla markaana ahaa degdeg ayaa la xaliyey, sida dhismaha Guddiga Xudduudaha iyo Arrimaha Federaalka, martigelintii shirkii Wasiirrada Arrimaha Dibedde ee IGAD, iyo shirkii madaxda Dowladda Federaalka iyo dowlad goboleedyada oo toddobaadkii hore ka dhacay magaalada Muqdisho, loogana arinsanayey horumarka Higsiga 2016 iyo Cahdiga Cusub. Dhowr xubnood oo ka tirsan ururka Al Shabaab ayaa ka soo goostey ururka, kuwaas oo ay ku jiraan boqolaal ka mid ah askarta caadiga ee ururka, iyadoo gargaarka aadaminimo iyo hawlaha xasilinta ay halkooda ka sii socdeen’’.
“Labadii sanno ee la soo dhaafey waxaa jirey hawlo badan oo ‘’daahsoon’’ , kuwaas oo looga gol lahaa in lagu soo dhiso dowlad si hufan u shaqeyneysa; haatan waxaa dowladdaas looga fadhiyaa inay isbeddel ku keento nolosha Soomaalida ku nool waddanka, isla markaana ay fidiso adeegyo wax taraya nolosha shacabka.’’
Madaxweynaha ayaa sidoo kale fariin u direy xubnaha cusub ee Golaha Wasiirrada.
“Raiisul Wasaaraha iyo Golihiisa Wasiirrada waa inay degdeg ugu dhaqaaqaan dhammeystirka hawlo badan oo kala duwan oo muddo dheer oo hore looga hadley: waa in la meel mariyaa sharciga asxaabta siyaasadda, isla markaana haatan ay bilowdaan sameynta wadatashi dadweyne oo la xiriira dib u eegista dastuurka, dhismaha hay’adaha dowliga, hay’adaha doorashada iyo kuwa kale ee la xiriira. Wasiirrada iyo wasaaradahooda waa inay degdeg u guda galaan hawlahooda, isla markaana ay gacan muuqata ka geystaan hagaajinta heerka nololeed ee shacabka Soomaaliyeed. Waxaa dhammaadey waqtiga hadalka, waxaana la jooga waqtigii fulinta waxyaabaha aan balanqaadney.”
DHAMMAAD
