Madaxweynaha Dawlad Goboleedka Puntland Dr. Cabdiweli Maxamed Cali Gaas iyo wefti uu hogaaminayey ayaa gelinkii dambe ee maanta dib ugu laabtay magaalada Garoowe ee caasimadda Puntland.
Madaxweynaha Puntland iyo weftigiisa ayaa waxaa garoonka diyaaradaha ee Janaraal Maxamed Abshir Muuse ee magaalada Garoowe kusoo dhoweeyey Madaxweyne Ku-xigeenka Puntland Eng. Cabdixakiin Xaaji Cabdullaahi Cumar Camey, maamulka Gobolka Nugaal, kan Degmada Garoowe, mas’uuliyiin ka tirsan goleyaasha Puntland, saraakiil ka tirsan Madaxtooyada Puntland iyo mas’uuliyiin kale.
Dr. Cabdiweli Maxamed Cali Gaas oo warbaahinta la hadlay ayaa ka warbixiyey shirkii amniga Qaranka Soomaaliya,oo uu kaga qayb galay magalada Muqdisho casimada Soomaaliya, shirkaas uu sheegay in uu ku soo dhammaadey guul, waxaana kaloo uu xusay inay isku af garteen Madaxda Qaranka Soomaaliya isla marahaantana maxsuul wanagsani ka soo baxay.
“Waxaa sharaf weyn noo ah inaa dib ugu soo laabano magalada Garoowe anagoo in mudo ah Xamar ugu maqneyn ka qayb galka shirka Amniga Qaranka oo y isugu yimaadeen madaxda DF Soomaaliya iyo madaxda Dawaladaha xubnha ka ah DF Soomaaliya, loogana hadlayey arrimo muhiim u ah xasilinta, xoreynta iyo dib u habeynta ciidanka qalabka sida ee Soomaaliyeed, iyadoo ay ka soo bexeen go’aamadii la soo saaray 10 Feb 2018 iyo waxyaaba kale oo wadanka masiirkisa muhiim u ah oo ay ka mid ahayd qaybsiga khayraadka dalka iyo anagoo ku saxiixnay hishiis kumeel gaar ah kalluumaysiga dalka sidii khayraadkiisa looga faa’iidaysan lahaa kaas oo muhiim u ah geedi socodka horumarka dalka, shirkaasina waxaa uu ku soo dhammaaday guul sida aad la wada socotaan” ayuu yiri Dr Cabdiweli Gaas oo hadalkiisa ku daray.
“Waan bogaadinaya Boosaaso dawlad iyo shacaba siday ugu gurmadeen doonti caariday iyo waanaga ay ku dhawdahay inay ku dhamaato, waxayna ka turjumaysaa isku tashiga Puntland, aad ayaan u bogaadinayaa madaxada sii joogtay dalka wanaaga, horumaraka iyo adkeenta dawladnimada iyo amniga Puntland ka sii shaqeeyay aad iyo aad ayeey u mahadsanyihiin”.
Ugu danbayn Madaxweynaha dowlad Goboleedka Puntland Dr. Cabdiweli Maxamed Cali Gaas ayaa sidoo kale sheegay in shirka madaxda Qaranka Soomaaliyeed looga hadlay arrimaha ammaanka iyo dhaqaalaha, waxaana uu tilmaamay in labada ajandeba ay muhiim u ahaayeen Qaranka Soomaaliyeed.
