Madaxweynaha Dawlad Goboleedka Puntland Dr; Cabdiweli Maxamed Cali Gaas ayaa Maanta ka qayb galay isu soo bax Roob doon ah oo ka dhacay duleedka Magaalada Garoowe.
Madaxweynaha Puntland ayaa Salaadda ka dib wuxuu Allelaahay uga baryay inuu ummaddiisa ka dul qaado Abaarta iyo Colaadda, isla markaana uu Caafimaad siiyo inta xanuusan.
C/wali Gaas, ayaa tilmaamay in loo baahan yahay in dhammaan umadda Muslimka ah ay Ilaahay u noqdaan isla markaana ay ka tanaasulaan wax kasta oo looga fogaan karo wanaagga iyo khayrka, wuxuuna Alle ka baryay Roob aan wax yeelin Dadka iyo Duunyada.
” Waxaan isugu nimi roob doon iyo ilaahay inaan barino , waxaana loo baahan yahay inaan ilaahay ka baqno, inaan is cafino, in aanu towbad keeno, inta nugul ee jilicsan ee dhibaatadu haysato aan u naxariisano oo aan ugu gargaarno wixii aan awoodno si deg deg ah, ilaahay waxaan ka baryaynaa inuu na cafiyo, ilaahayoow khatumada noo suubbi, ilaahow beddel khayr qaba ayaanu kaa barinay, ilaahow nasii roob khayr qaba oo aan dhibaato noo geysan, ilahow abaarta iyo colaadda naga saar” ayuu yiri Madaxweynaha Puntland.
Degaannada Puntland ayaa in dhowaalaba waxaa ka taagnaa Abaaro Lixaad leh oo saameeyay Dad iyo Duunyo, waxaana haatan soconaya gurmadyo ku aaddan sidii loo samata bixin lahaa.
