Madaxweynaha Puntland Dr. Cabdiweli Maxamed Cali Gaas oo shalay soo gaaray magaalada Muqdisho ayaa maanta la kulmay ku simaha safiirka dowladda Qatar ee Soomaaliya danjire Xasan Bin Xamza Asad.
Kulanka labada mas’uul oo lagu qabtay xarunta safaaradda Qatar ee Muqdisho ayaa waxaa looga hadlay sidii mashaariicda dowaldda Qatar ay ka fulineyso Soomaaliya qeyb looga siin lahaa deegaanada maamulka Puntland.
Madaxweynaha dowlad goboleedka Soomaaliyeed ee Puntland C/wali Maxamed Cali Gaas ayaa dowladda Qatar ka codsaday in ay gacan ka geysato dib u dhiska isbitaalka guud ee magaalada Gaalkacyo
Hassan Bin Hamza Asad ku simaha safiirka dawladda Qadar ee Soomaaliya ayaa dhankiisa soo dhoweeyay dadaalada lagu xoojinayo wax wada qabsiga Soomaaliya iyo Qatar isagoo sheegay in dowladda Qatar ay aad ugu xuntahay dhibaatada dadka Soomaaliyeed ku hayaan kooxda Al-shabaab.
Ku simaha danjiraha dowladda Qatar ee Soomaaliya ayaa sidoo kale, xusay in dowladiisa ka go’an tahay taageeridda shacabka Soomaaliyeed guud ahaan isla markaana Qatar ay ka qeyb qaadan doonto dib u dhiska guriyihii dhowaan u burburey qaraxyadii ka dhacay magaalada Gaalkacyo.
