Madaxweynaha Dowlad gobaleedka Puntland Mudane Siciid Cabdullaahi Deni, ayaa Shir-guddoomiyey kulanka Golaha Wasiirada Puntland oo looga hadlay todobaadkan arrimaha Amniga, Caabuqa COVID-19, xaaladda Gobollada, Doorashooyinka iyo Siyaasadda Biyaha Puntland.
Kulanka Golaha Wasiirada oo uu ka qeybgalay Madaxweyne Ku-xigeenka Puntland Mudane Axmed Cilmi Cismaan Karaash, waxaa sidoo kale looga hadlay Ciyaaraha Gobollada Puntland.
Madaxweynaha Puntland Mudane Siciid Cabdullaahi Deni, ayaa bogaadiyay in Ciyaaraha Gobolada Puntland ay si weyn u xoojiyeen is-dhexgalka bulshada, dhiirigelinta dhallinyarada iyo ka qeyb qaadashada horumarka Puntland.
Mudane Siciid Cabdullaahi Deni ayaa faray Mas’uuliyiinta ay khuseyso iyo dhammaan Hay’addaha Puntland in loo baahanyahay mas’uuliyad dheeri ah oo la iska saaro sidii Ciyaaruhu si qurux badan uga soo dhammaan lahaayeen, lagana wada qeyb qaato oo lala shaqeeyo Wasaaradda iyo guddiyada la shaqeynaya.
