Madaxweynaha Dowlad goboleedka Hirshabeelle Mudane Cali Cabdullaahi Cosoble ayaa hambalyo u diray Guddoomiyaha Cusub ee Aqalka Sare Mudane Cabdi Xaashi Cabdullaahi, iyo Ku xigeenadiisa oo maanta Xubnaha Aqalka Sare ay ku doorteen Magaalada Caasimada ah ee Muqdisho.
“Doorashada Guddoonka aqalka sare waa guul taariikhi ah oo u soo hoyatey shacabka Soomaaliyeed Waxay tani qeyb ka tahay horumarada dalka uu ku tilaabsanayo loona baahanyahay in la sii xoojiyo, Hambalyo ayaan leeyahay Guddoomiyaha aqalka sare Cabdi Xaashi Cabdullaahi, iyo labadiisa ku xigeen Mudane Abshir Bukhaari,iyo Mudane Mowliid Xuseen Guhaad, xilka culus ee la idiin doortay allaha idiin ka dhigo kuwii ka soo baxa oo horumar gaarsiiya dalka” Ayuu Yiri Madaxweynaha Hirshabeelle Cali Cabdullaahi Cosoble.
Madaxweyne Cosoble Oo Sii Hadlay ayaa sheegay in ay ku faraxsanyihiin Bulshada reer Hirshabeelle horumarada laga gaaray geedi socodka siyaasadda Soomaaliya, waxaana guddoonka Aqalka sare iyo dhamaan xildhibaanada aqalka sare uu ku booriyay in ay dalka u horseedaan xasilooni siyaasadeed, kana shaqeeyaan xoojinta dowladnimada.
Ugu dambeyn Madaxweynaha Dowlad goboleedka Hirshabeelle Mudane Cali Cabdullaahi Cosoble ayaa Ciidamada Qalabka Sida ee Soomaaliya ku amaanay sida habeen iyo maalin ay ugu taagan yihiin sugida ammaanka goobaha doorashooyinka dalka ay ka dhacayaan, waxaana uu ku booriyay Ciidamadaasi in ay sii laba jibaaraan howlkarnimadooda.
———————-DHAMMAAD——————–
