Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo oo ku guda jira socdaalka nabadda ee uu ku marayo qeybo ka mid ah gobollada dalka oo shalay gaaray magaalada Qardho ee Gobolka Bari ayaa xalay Ku hooyday Magaaladaasi..
Madaxweynaha ayaa waxaa si diirran ugu soo dhaweeyey Qardho kumanaan shacab ah oo isugu soo baxay fagaarayaasha magaalada iyaga oo ruxaya calanka Jamhuuryadda Federaalka Soomaaliya.
Madaxweyne Farmaajo ayaa meel fagaare ah kula hadlay shacabka isugu soo baxay soo dhaweyntiisa, waxa uuna ku ammaanay wadinayadda iyo rajada wanaagsan ee ay ka qabaan dalka.
“Walaalayaal soo dhaweyntiinna diirran waxa ay ka tarjumeysaa in aad tihiin dad dowladdooda jecel, anagana waxaa nagu ballan ah in aan idiin adeegno. Idinkana waxaan idinka codsaneynaa in aad taagerdiina sii waddaan oo aad garab istaagtaan dowladdiina.”
Sidoo kale, Madaxweynaha Jamhuuriyadda waxa uu dhagax dhigay dhismaha faraca Jaamacadda Umadda ee magaalada Qardho oo ay hirgelinayso dowladda Federaalka Soomaaliya.
Madaxweyne Maxamed Cabdullaahi “Farmaajo”, Madaxweynaha Dowlad Gobolleedka Puntland Mudane Maxamed Cabdiweli Maxamed Cali Gaas, Wasiirro heer Federaal ah iyo heer Gobolleed, Xildhibaanno ka tirsan labada Aqal ee dowladda Federaalka iyo masuuliyiin kale oo qeyb ka ah socdaaka nabadda ayaa waxaa shalay qado sharaf u sameeyey Boqor Burhaan Boqor Muuse oo ka mid ah duubabka dhaqanka Soomaaliyeed.
Madaxweynaha oo ku socdaalayey dhanka dhulka inta uu ku guda jiray safarkiisa ayaa ku hakaday magaalooyin iyo deeganno ka tirsan Gobollada Nugaal iyo Bari, isagoo shacabka salaamayey xaaladahooda nololeedna ka waraysanayey
Mudane Maxamed C/llaahi Farmaajo iyo Wafdiga uu hogaaminayo ayaa lagu wadaa in socdaal dhanka dhulka ah ugu Ambabaxaan maanta deegaanka Carmo, isagoo halkaasi uga sii gudbi doono Magaalo Madaxda Gobolka Bari ee Baasaaso, halkaas oo maamulka iyo bulshada qeybaheeda kala duwan ay diyaar garow ugu jiraan soo dhaweynta Madaxweynaha iyo Wafdigiisa.
Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa inta uu ku suganyahay Puntland waxa uu kulamo wadatashi la yeelan doonaa qeybaha kala duwan ee bulshada.
