Madaxweyne ku xigeenka Galmudug mudane Maxamed Xaashi Cabdi iyo wafdi uu hogaaminayay oo maalmahaan ku sugnaa magaalada Galkacyo ee xarunta gobalka Mudug ayaa maanta kormeer ku aadanaa u kuurgalidda xaaladda
shaqo ku tagay qaar ka mid ah xarumaha maamulka Galmudug ee ku yaala magaalada Galkacyo.
Meelaha uu madaxweyne ku xigeenka Galmudug uu kormeeray waxaa a mid ah Xarunta maamulka dagmada Galkacyo xarunta taliska qeybta booliiska gobalka Mudug saldhigga ciidanka booliiska dagmada iyo xarunta wasaaradda waxbarashada ee gobalka Mudug ee dowlad gobaleedka Galmudug.
Wafdiga ayaa intii ay ku sugnaayeen xarunta dowladda hoose ee maamulka dagmada Galkacyo waxa ay
kulan la qaateen xubnaha golaha deegaanka dagmada, iyagoona ka dhageeystay warbixinno ku aaddan xaaladda
shaqo ee maamulka dagmada iyo sidoo kale baahiyaha dhanka adeegga bulshada, kuwaasoo sheegay in ay jiraan baahiyo farabadan oo xiligaan aysan wax ka qabashadooda awood u laheyn.
Sidoo kale masuuliyinta maamulka dagmada Galkacyo oo ugu horeeyo gudoomiyaha dagmada Xirsi Yuusuf Barre
ay ka codsadeen madaxweyne ku xigeenka iyo wafdigiisa in sida uga dhaqsiyaha badan dowlad gobaleedka Galmudug ay usoo saaraan xeerkii wada shaqeeynta hay’adaha kala gadisan ee maamulka.
Maxamed Xaashi Cabdi madaxweyne ku xigeenka Galmudug ayaa sheegay in ay ku dadaali doonaa wax ka qabashada arimaha ay soo gudbiyeen maamulka dagmada Galkacyo isagoona xusay waxa u horeeya ee ay xoogga
saarayaan ay tahay tababarida shaqaalaha maamulka dowlada hoose.
Madaxweyne ku xigeenka Galmudug iyo wafdigiisa ayaa intii ay kormeerkooda ku guda jireen waxa ay warbixino ka dhageeysteen sarakiisha ciidanka booliiska Galmudug taas oo inteeda badan la xariirta baahiyada adeegyada ciidanka booliiska ay u baahan yihiin iyo ka warqabidda maxaabiista iyo eedeeysanayaasha ku xiran xabsiga iyo
saldhigga magaalada Galkacyo
