Madaxweynaha Jamhuuriyadda Federaalka Soomaaliya Mudane Xasan Sheekh Maxamuud, ayaa ugu baaqay waxgaradka iyo shacabka gobollada Mudug iyo Galgaduud in ay isu tanasulaan
Madaxweyne Xasan Sheekh Maxamuud oo howlo shaqo u jooga magaalada Dhuusa-mareeb ee xarunta gobolka Galgaduud, ayaa sheegay in shacabka Soomaaliyeed ay ka soo daaleen is qab-qabsi, loona baahan yahay in loo gudbo midnimo iyo in dadka ay aayahooda ka tashadaan.
“Waan idin la joogi doonaa inta aad ka gaareysaan maamul dhisidda dowlad gobolleedka gobollada dhexe ee Soomaaliya, dadka Soomaaliyeed ee walaalaha ahna waxaan ugu baaqayaa mar kale is cafiyaan oo ay la shaqeeyaan horumarinta danaha dadkooda iyo dalkooda” ayuu yiri madaxweyne Xasan Sheekh.
Madaxweynaha Soomaaliya, ayaa uga mahadceliyey dadka gobollada Mudug iyo Galgaduud dadaalka ay ku bixiyeen sidii loo gaari lahaa dib u heshiisiin waarta si loogu gudbo dowladnimo, dowladda dhexe ee Federaalka ahna ay diyaar u tahay in ay taageerto wax walba oo muhiim u ah dadka gobolladaan.
Madaxweynaha Soomaaliya, ayaa markii sadexaad safar howlo shaqo ah ku jooga magaalada Dhuusa-mareeb ee gobolka Galgaduud, si madaxweynuhu dadaal ugu bixiyo sidii loo dhammeystiri lahaa wada hadallada dib u heshiinta ah ee maamulka loogu dhisayo gobollada Mudug iyo Galgaduud.
