Madaxweynaha Dowladda Federaalka ah ee Soomaaliya mudane Xasan Sheekh Maxamuud iyo wafdi uu hogaaminayo oo ku sugan dalka Jamhuuriyada Jabuuti ayaa halkaasi kula kulmay Madaxweynaha Maamulka Somaliland.
Madaxweyne Xasan Sheekh casuumaad rasmi ah ka helay dhigiisa Dalka Jabuuti mudane Ismaaciil Cumar Geelle ayaa ugu horeyn labada mas’uul waxa ay kaga hadleen xaaladda dalka iyo horumarka ay dowladda ku talaabsatay.
Wariyaha Warbaahinta Qaranka ee Jabuuti Sagal Saciid Faarax ayaa sheegay in kulanka labada Madaxweyne ee Soomaaliya iyo Jabuuti intii uu socday uu ku soo biiray Madaxweynaha Maamulka Somaliland Axmed Maxamed Siilaanyo, kaasi oo horudhac u ah kulanka beri ka furmayo Jabuuti ee ku saabsan wadahadaladii u dhexeeyay dowladda Federaalka ah ee Soomaaliya iyo Maamulka Somaliland, kaasi oo horey hakad u gelay.
Madaxweyne Xasan Sheekh iyo Madaxweynaha Maamulka Soomaaliland Siilaanyo ayaa sanadkii hore ku kulmay dalka Turkiga, iyadoo kulanka dhex maray uu goob joog ka ahaa Ra’iisul Wasaarihii Turkiga Recep Tayyib Erdogan oo hadda ah Madaxweynaha Turkiga.
