Madaxweynaha Jamhuuriyadda federaalka ah ee Soomaaliya mudane Xasan Sheekh Maxamuud, Guddoomiyaha baarlamaanka Federaalka ah Mudane Maxamed Sheekh Cismaan Jawaari iyo Madax kale ayaa ka qeyb galay xuska maalinta Afka Soomaaliga la qoray oo ku beegan maanta.
Munaasabada lagu weyneynayay 42-guurada ka soo wareegtay qoriska iyo isticmaalka Afka hooyo waxaa kaloo ka qeyb galay mas’uuliyiin ka tirsan dowladda, diblomaasiyiin iyo marti sharaf kale.
Siihayaha Wasiirka Warfaafinta iyo Hanuuninta dadweynaha Mudane Mustaf Sheekh Cali Dhuxulow ayaa sheegay in maanta ay tahay maalin weyn oo qiimo ugu fadhida bulshada Soomaaliyeed, maadaama ay tahay maalinkii ugu horeysay ee uu soo baxo Wargeyska Xidigta Oktoobar oo Afka hooyo ku qoran, Wasaaradduna ay door lixaad leh ka qaadan doonto dib u soo nooleynta Wargeysyadii hore.
Siihayaha Wasiirka Hidaha iyo tacliinta Sare ee Soomaaliya mudane Ducaale Aadan Maxamed oo ka mid ahaa Mas’uuliyiinta ka qayb gashay Munaasabada ayaa waxaa uu Madaxweynaha jamhuuriyada ka codsaday in xarumaha Hidaha iyo dhaqanka Jamhuuriyadda dib u dhis lagu sameeyo si Afka Soomaaliya kobcintiisa ay qayb uga qaataan, kuwaa oo ay ka mid yihiin Tiyaatarka, Akadamiyada Cilmiga iyo Fanka iyo kuwa kale.
Guddoomiyaha baarlamaanka Federaalka ah ee Soomaaliya mudane Maxamed Sheekh Cismaan Jawaari oo ku dheeraaday ka hadalka taariikhda iyo heerarkii loo soo maray hirgelinta Afka Soomaaliga ayaa waxaa uu sheegay in Hormarinta afka ay ka qayb qaadan karaan in Lahjadaha kala duwan ee Soomaalidu leedahay la ixtiramo, waxaana uu ugu baaqay Bulshada in ay ku adkaadaan in Afka Soomaaliga heer la gaarsiiyo, isagoo xusay maanta in ay tahay maalin u baahan in bulshada la fahamsiiyo qiimaha gaarka ah ee ay ummadda u leedahay.
Madaxweynaha Jamhuuriyadda Federaalka ah ee Soomaaliya mudane Xasan Sheekh Maxamuud ayaa sheegay maanta oo kale ay shacabka ugu fadhiso qiimo aad u weyn, dowladduna ay dadaal u galeyso sidii shacabka loo bari lahaa muhiimadda maanta oo kale ay u leedahay.
Madaxweyne Xasan Sheekh ayaa amar ku bixiyay in laga bilaabo maanta aysan xafiisyada dowladda ka soo bixi Karin Warqad ku qoran afka qalaad, si loo horumariyo afka hooyo in waxkasta lagu qoro Af-Soomaali.
