Madaxweynaha Soomaaliya Mudane Xasan Sheekh Maxmauud iyo Madaxweynaha Jabuuti Mudane Ismaaciil Cumar Geelle ayaa waxaa ay khudbad u jeediyeen Ciidamada dalka Jabuuti ee qeybta ka ah howlgalka Midowga Afrika ee AMISOM, Madaxweynaha Jabuuti ayaa waxaa uu Ciidamada ku booriyay in ay sii laba laabaan dadaalada nabad ku soo dabaalidda dalka Soomaaliya.
Madaxweynaha Soomaaliya ayaa dhankiisa Ciidamada Midowga Afrika gaar ahaan kuwa ka socoda dalka aynu walaalaha nahay ee Jabuuti ugu mahadceliyay sida ay u garab taagan yihiin shacabka Soomaaliyeed isla markaana ugu dul qaadeen kooxda nabad diidka ah ee Al-shabaab.
Dhanka kale odayaasha dhaqanka gobolka Hiiraan ayaa waxaa ay sheegeen Madaxweynaha Jabuuti Taallo loogu dhisi doono degmada Buulo-Burte si jiilasha dambe ay u ogaadaan wax qabadka iyo gacanta walaalnimo ee Madaxweyne Geelle uu siiyay shacabka Soomaaliyeed.
Sidoo kale Madaxweynaha Jamhuuriyadda Jabuuti ayaa waxaa halkaasi lagu gudoonsiiyay Beer weyn oo 7 KM ah oo ku taala degmada Buullo-Burde kuna dhow Webiga shabeele ee mara degmadaasi taas oo Madaxweyne Geelle uu halkaasi ku gudoomay.
