Xoghayaha Guud ee Gobalka Mudug ahna ku simaha Guddoomiyaha Gobalka Maxamed Cali Qoobcad oo ay wehliyeen Mas’uuliyiin ka socatay Wasaaradda gar gaarka iyo maareeynta masiibooyinka Galmudug ayaa Maanta Xariga ka Jaray Xafiiska Qeybta Barakacayaasha iyo Samafalka Gobalka Mudug.
Madaxa qeybta barakacayaasha iyo samafalka Gobalka Mudug Cabdiraxmaan Cabdulqaadir Sahal ayaa sheegay in xafiiska uu yahay kii u horeeyay ee laga furo Gaalkacyo isla markaana loogu adeegi dano danyarta iyo boqolaalka kun ee barakacayaashaa ee ku sugan Guud ahaan Gobalka Mudug.
Isku duwaha Wasaaradda Gargaarka iyo maareeynta musiibooyinka Galmudug ee Gobalka Mudug Cabdirisaaq Cabdullaahi Dable ayaa isna sheegay in furitaanka xafiiskaan uu qeyb ka qaadanayo dardar galinta arrimaha samafalka iyo gaar gaarka gobalka Mudug oo xiligaan baahi weyn loo qabo.
Xoghayaha Gobalka Mudug ahna ku simaha Guddoomiyaha Gobalka Mudug Maxamed Cali ayaa isna ugu baaqay cid kasta oo ka shaqeeysa arrimaha samafalka gobalka Mudug in ay la shaqeeyaan madaxda Qeybta barakacayaasha iyo samafalka.
