Maamulka degmada Buula-burde ee gobolka Hiiraan ayaa faahfaahin ka bixiyay howllgallo lagu dilay maleeshiyaad ka tirsan Al-Shabaab oo ciidamada ay ka sameeyeen deegaanno hoostaga degmadaasi.
Guddoomiyaha Degmada Buulo burde Cabdicasiis Duuroow Cabdi oo la hadlay Radio Muqdisho ayaa sheegay in howlgallo ay ciidamada ka sameeyeen tuulooyin hoos taga degmada Buulo burde ay ku dileen lix ka tirsan maleeshiyaadka Al-Shabaab, waxaana uu intaa ku daray in ciidamada ay sii wadayaan howlgallada lagu baacsanayo Al-Shabaab.
“Ciidamada oo helay xog ah in tiro Al-Shabaab ay ku dhuumaaleysanayaan deegaanno hoosta taga degmada ay ku duuleen, waxa ay halkaasi ku dileen lix ka tirsan Al-Shabaab oo ku dhuumaaleysanayay tuulada buur weyn iyo deegaanno kale” ayuu yiri Guddoomiyaha.
Guddoomiyaha Degmada Buulo burde ayaa shacabka ka codsaday inay xoojiyaan la shaqeynta ciidamada amniga ee dowladda, si looga hortago dhagarta argagixisada Al-Shabaab.
