Wasiirka hubka dhigista iyo dhaqan celinta maleeshiyaadka maamulka Koonfurgalbeed ee dalka Xuseen Xasan Cali ayaa sheegay inay tababaro u sameeyeen maleeshiyaad ay hub ka dhigis ku sameeyeen, kuwaasi oo la barayo xirfado ay ku shaqeystaan halka kuwa kalena tababarro ciidan la siinayo
Wafdi uu hogaaminayay Xuseen Xasan Cali oo gaaray xerada tababarka Cali Salaameey ayaa warbixino ka dhageystay Macalimiinta tababarka bixineysa oo ka hadlay sida ay ku socdaan tababarka ciidan ee la siinayo maleeshiyaadka hub ka dhigista lagu sameeyay.
Wasiirka hubka dhigista iyo dhaqan celinta maleeshiyaadka maamulka Koonfurgalbeed ee dalka oo la hadlayay Radio Muqdisho ayaa sheegay in dufcaddii ugu horeysay ka soo bixi doonaan xeradaasi, kuwaasi oo uu ku sheegay in looga fadhiyo sidii deegaannada maamulka Koonfurgalbeed looga saari lahaa haraadiga ururka Gumaadka Ummadda Soomaaliyeed ee UGUS.
“Waxaad tihiin ciidamadii ugu horeysay ee maamulka Koonfurgalbeed ku tashanayo, waxaana idin balan qaadeynaa marka uu tababarka idin soo idlaado in aad heshaan wixii xuquuq ah ee ay ciidan u baahanyihiin, idinkuna la idinka rabo in aad gudataan waajibaadka la idin idmaday” ayuu yiri Xuseen Xasan Cali.
