Dawladda Maraykanka, ayaa mar kale si aad u culus uga hor timid xad gudubka Ethiopia ee ka dhanka ah dalkeenna, wuxuuna ku tilmaamay ficilka Abiy Axmed mid halis ku ah xasilloonida gobalka, taas oo xagal daacineysa dagaalka ka dhanka ah Khawaarijta.
Agaasimaha Isgaarsiinta istiraatijiyadeed ee Golaha Amniga Qaranka Maraynaka John Kirby ayaa sheegay in ay dhibeyso falalka ay ku kacayso dowladda Itoobiya.
“Runtii wey na dhibeeysa arrintaasi, sida aan marar badan sheegnay, waxaan taageersannahay madax-bannaanida Soomaaliya iyo wadajirka dhuleed, waana in la ixtiraamo” ayuu yiri Agaasimaha isgaarsiinta istiraatijiyadeed ee Golaha Amniga Qaranka John Kirby.
Xaaladdaan waxa ay keeneysaa qatar amniga Qaranka ah, ayuu yiri Kirby, taas oo ah mid dhiiri gelin karto xagjiriinta Al-Shabaab oo muddo dheer dagaallo arxan daran ka waday gudaha Soomaaliya.
Agaasimaha ayaa sheegay in heshiiska uu carqalad ku yahay dagaalka ay Soomaalida, Afrikaanka iyo saaxiibada caalamiga ah ee gobolka ay kula jiraan khawaarijta.
