Xukuumadda Washington ayaa ballan-qaadday inay dadaallo u gali doonto sidii loo dejin lahaa xiisadda dagaal ee ka taagan dalka Itoobiya, xilli waddamada Afrika ay walaac kamuujiyeen dagaallada kasii socda dalkaas ee u dhexeeya ciidammada dowladda iyo xoogagga is baheystay ee Jabhadda Itoobiya.
Wasaaradda arrimaha dibadda Maraykanka ayaa warbixin kooban oo ay soo saartay ku sheegtay in dagaalada sii xoogeysanaya ee ka socda Itoobiya aan la aqbali karin, waxayna ugu baaqday dhinacyada ku dagaalamaya Itoobiya inay joojiyaan dagaalak oo ay u soo diyaar garoobaan wada hadallo, si xal looga gaaro dhibaatada ka taagan dalka.
Ergeyga Joogtada ah ee Dowladda Maraykanka u fadhiya Qaramada Midoobay, Linda Thomas Greenfield, ayaa sheegtay intii lagu guda jiray fadhi Golaha Ammaanka ee Qaramada Midoobay ay ka yeesheen qalalaasaha Itoobiya in aan loo dulqaadan Karin waxyaabaha foosha xun ee ka dhashay dagaalada ka socda Itoobiya.
Linda Thomas, ayaa tiri: “ Midnimada iyo wadajirka dawladda Itoobiya waxaa soo wajahay khatar baahsan, taas oo malaayiin rayid ah oo aan waxba galabsanina ay halis ugu jiraan, walina waxaa noo muuqda in ay sii balaaraneyso waxyeellada dagaalka”.
Dhanka kale, Kaaliyaha Xoghayaha Guud ee Qaramada Midoobay u qaabilsan arrimaha siyaasadda iyo dhismaha nabadda Rosemary DiCarlo, ayaa ka digtay in dagaalka sokeeye ee ka socda gudaha Itoobiya.
Ugu danbeeyntii Mareykanka ayaa ugu baaqay dhammaan dhinacyada ku dagaalamaya Itoobiya inay si deg deg ah u joojiyaan dagaallada, iyaga oo xusay in haddii dagaalada ay sii socdaan uu dalka wajahayo khatar baahsan.
