Dowladda Mareykanka ayaa cambaareysay weerarkii lagu qaaday Hotelka Maka Al-Mukarama ee ay maleeshiyada Al-Shabaab doonayeen inay ku xasuuqaan dad rayid ah iyo mas’uuliyiin goobta ku sugneyd.
War-saxaafadeed ka soo baxay Wasaaradda Arrimaha dibadda ee Mareykanka ayaa lagu sheegay in Washington ay aad uga xuntahay falkii ay Shabaabku ku qaadeen hotelka, waxaana ay tacsi u direen ehelada iyo asaxaabta dadkii weerarka ku dhintay.
Dowladda Mareykanka ayaa ciidamada amniga ku ammaantay sida ay u yareeyeen qasaaraha ay doonayeen dhagar qabayaashu inay u geystaan dadkii hotelka ku sugnaa, iyagoo ciidamada ku booriyay inay sii labo jibaaraan howlgallada ka dhanka ah ee argagixisad Al-Shabaab.
War-saxaafadeedka ayaa lagu yiri “Dowladda Mareykanku waxa ay garab taagantahay sidii ay u xoojin lahayd taageerada ay siineyso dowladda iyo shacabka Soomaaliyeed, si loo soo celiyo xasiloonida, ammaanka iyo kala dambeynta, mana saameyn doonto weerarada fuleynimo ee ay argagixisada sameynayaan, waxaana diyaar u nahay sidii wdajir loogu cirib tiri lahaa Al-Shabaab”
