Ciidamadii ugu horreeyay ee Mareykan ah ayaa saacadihii u dambeeyey gaaray waddanka Poland, si ay u xoojiyaan xulafada NATO ee ku sugan Bariga Yurub, sida ay sheegtay Wasaaradda Difaaca Poland, iyadoo laga cabsi qabo in Ruushka uu ku duulo dalka deriska la ah ee Ukraine.
Ciidamada Mareykanka ayaa gaaray saldhiga milatari ee Rzeszow oo ku yaalla koonfur bari Poland, una dhow xadka uu la wadaago Ukraine, kadib markii madaxweynaha Mareykanka Joe Biden uu Arbacadii amray in 1,700 oo askari la geeyo halkaasi. Ilaa 4,000 oo askari oo Maraykan ah ayaa Poland joogay tan iyo 2017. Biden ayaa sidoo kale amar siiyay ciidamada Romania iyo Jarmalka, isaga oo tirada guud ee ciidamada dheeraadka ah gaarsiiyay ku dhawaad 3,000.
Mareykanka ayaa 8,500 oo kale oo askar Mareykan ah geliyey heegan sare bishii Janaayo si loo geeyo Yurub haddii loo baahdo. Waxay weli ku jiraan heegan sare waxaana la filayaa in wasiirrada gaashaandhigga ee NATO ay ka wadahadlaan in xoojin dheeraad ah lagu daro kulankooda soo socda ee Febraayo 16-17.
Xoghayaha arrimaha dibadda ee Maraykanka Antony Blinken ayaa Jimcihii khadka taleefoonka kula hadlay wasiirka arrimaha dibadda ee Ukraine Dmytro Kuleba, iyagoo ka wadahadlay dhismaha ciidamada Ruushka ee xadka Ukraine iyo khatarta iskahorimaadyada hubeysan.
