Dowladda Mareykanka ayaa liiska argagixiso ku dartay horjoogaha Ururka Gumaadka Ummadda Soomaaliyeed ee UGUS iyo horjoogayaal kale oo Al-Shabaab ka tirsan.
War qoraal ah oo ka soo baxay Wasaaradda arrimaha dibadda Mareykanka, ayaa lagu sheegay in Horjooge Axmed Diiriye oo loo yaqaano Abuu-Cubeyd uu mas’uul ka ahaa weerarro ay kooxga argagixsisada Al-Shabaab ka geysatay gudaha dalka iyo Kenya, tan iyo markii uu xilka qabtay, kaddib dilkii horjoogihii hore ee Al-Shabaab, Axmed Cabdi Aw-Godane bishii September, sannadkii hore lagu dilay duqeyn xagga cirka ah.
Mareykanku, wuxuu sheegay in horjoogahan Abuu-Cubeyda uu ku shaqeeyo mabaa’diidii Godane, isagoo xubin firfircoon ka ah Al-Qaacidda.
Mahad Karatee oo ah madaxa sirdoonka Al-Shabaab, ayaa isna liiska argagixisada lagu daray, waxayna wasaaradda arrimaha dibaddu sheegtay in uu madax u yahay kooxda Amniyaatka oo ka mas’uul aheyd weeraro kala duwan oo laga geystay Kenya iyo Soomaaliya.
Xukuumadda Washington, ayaa Al-Shabaab u aqoonsatay koox argagixiso sannadkii 2008.
9-kii bishan ayay ahayd markii Golaha Wasiirada ee Xukuumadda Federaalka ah ee Soomaaliya uu ansixiyay liiska Horjoogayaasha Al-shabaab ee madaxooda lacagaha la dul dhigay.
